Ranieri a chak ve ta

Claudio Ranieri enkawlna hnuaia a vawi khat nan Watford an chak a, Joshua King-a hattrick hmangin an mikhualna ramah Everton chu 5-2 ngawtin an sawp.

Italian manager Ranieri hian Xisco thlakin October 4 khan Watford enkawl hna a thawk ṭan a, a match hmasa berah Liverpool chu 5-0 in ngam lo mah se Everton lakah inhrithlain an chak chiang hle.

Mualneitu Everton tan Tom Davies chuan minute thumna lekah goal hmahruai a khung a, Rafael Benitez enkawlna hnuaia team tlo tak Everton hi awlsam takin an chak dawn nia ngaihna a lian hman.

Mahse, minute 13-na lekah Everton duh loh King chuan si phurh a rawn sut a, rei tak chu team pahnih an intum tawk hle. Everton-in goal an mamawh hriain hliam dam kawr Richarlison an luhtir a, minute 63-naah an mamawh goal a pe.

Ranieri-a'n huaisen taka thutlukna siamin forward pahnih Emmanuel Dennis leh Joao Pedro a luhtir zui a, thutlukna a siam fuh - player pahnih hian goal thum an khung nan an thawhhlawk hle.

Juraj Kucka chuan Watford tan minute 78-naah si phurh a sut a, a bak chu King leh bench aṭanga luhtir Dennis leh Pedro chan a ni.

Joshua King hian minute 80 leh 86-naah goal khungin hattrick a siam a, Dennis-a assist ve ve a ni. Chu chauh a ni lo. Hun pek belhah Dennis hian a khung ve leh a, Pedro siamsak a ni thung.

Kum 29 mi Joshua hian February khan Everton a zawm a, league match 11-a goal a khung loh hnuah a contract pawhsei sak a ni lo. Nipui transfer khan Watford hi free transfer-in a zawm a, amah duh lotu lakah hattrick a siam hi a lawm khawp ang.