Dan theih loh Bayern Munich

Bayern Munich leh Robert Lewandowski chuan an hawina lam apiangah goal an khung a ni ber mai. German champion hian Inrinni zan khan an mikhual Hoffenheim chu 4-0 in an sawp.

Hripui leng a tawrh vangin Bayern hi an manager Julian Nagelsmann-a'n a la ho thei lo, assistant manager Dino Toppmoller chuan a kaihruai - manager pangngai awm lo mah se goal khung lamah an buai chuang lo.

German champion tan hian Serge Gnarbry, Lewandowski, Eric Maxim Choupo-Moting leh Kingsley Coman ten a khat mawi tawkin goal khat ṭheuh an khung a, Mizorama rawn inkhel tawh Hoffenheim lamin a chhan letna tur an nei ve lo a ni.

Bavarians hian kar hmasa khan Bundesliga-ah Bayern Leverkusen lakah goal nga an khung, Champions League-ah Benfica hmachhawnin goal li an khung, tunah chuan Hoffenheim an sawp leh ta. Bayern hi tumah hmachhawn an châk lo ang.

Inrinni zan inkhelah hian Allianz Arena-ah fans 60,000 zet an pungkhawm a, thawm a ṭha hem hem hle. Hripui len hnu, kum 2020 March thla hnu lamah tun ṭum hi fans an punkhawm hnem leh ber ṭum a ni a, fans tan chanchin lawmawm bik a ni.

Inkhel dangah Borussia Dortmund chuan Arminia Bielefeld 3-1 in an hneh ve bawk. Dortmund tan England international Jude Bellingham chuan 'solo goal' ṭha tak a khung a, midfielder Emre Can leh Mats Hummels ten an khung ve bawk.