Mizo tlangval Sangtea a chak awlsam

WBC youth champion Lalrinsanga Tlau chuan Inrinni zan khan Dubai Fight Night-ah a khingpui Georgian boxer Ilia Beruashvili chu round lina lekah technical knockout hmangin a hneh.

Khawruhlian tlangval Sangtea hian professional fight vawi ruk a hmachhawnah hnehna a la chang vek a, tun ṭuma inhnek hi Eric Quarm hneha World Boxing Council Youth Super Featherweight title a lak hnua a inhnek hmasa ber ni mah se title inchuhna a ni lo.

Inhnek chu
Sangtea hian Beruashvili lakah round khatna aṭangin inhnek a thunun. Mizo boxer hian a hnek chhuak tam a, Georgian boxer hi round hmasa berah a tlu a, amaherawhchu a tawlhthluk vang a ni thung.

Beruashvili hian a tluk hnuah rawn bei chiam tum mah se Mizo tlangvalin a ngam zawk a, round hmasa ber tawp dawnah inhnek a nung ṭha hle. Round hnihnaah Sangtea'n knockout ngei tumin a nawr na a, chutihrualin professional fight vawi 23 hmachhawn tawh Georgian boxer-a'n tlan chhe paha beihin tluk mai a tum lo.

Round thumnaah Sangtea'n mawi zetin Beruashvili a hnek tlu a, chutihrualin Georgian boxer hian round lina dar rik thleng a daih thung. Amaherawhchu round lina tawp hma chiah hian Mizo boxer hian chiang takin a hnek fuh a, Beruashvili hi a inhnek zui theih tak loh avangin towel var thehluhin inhnek tihtawp a ni.

Sangtea a lawm
Mizo zinga professional boxer hmasa ber Lalrinsanga Tlau chuan, "Ka kal hma khan ka hritlang a, tun thlenga a la dam loh avangin ka hah hma. Ka khingpui kha ka rin aiin a fei a, tlu mai turah ka ngaih hnuah khan a tlu ta mai lo. A peih tluan ta lo a, awlsam deuhin ka chak theih phah a ni," tiin Vanglaini a hrilh.

Lawmthu sawi zuiin Sangtea chuan, "Dubai-a ka inhnek vawi hnihna a nih avangin ring chhung boruak kha chu a harsa lo a, chutihrualin ring pawn boruak rip tak avangin pressure a awm. Ka inhnek thlira min lo ṭantu zawng zawng chungah lawmthu ka sawi a, ka inhnek hmabak lehzel turah Mizo mipuite min ṭawngṭaisak turin ka ngen bawk a ni," a ti.

Mizo zinga professional boxer hmasa ber Sangtea hian September 22, 2019-a professional career a ṭan hnuah Digari Mahesh (UD), G. Mallikharjuna (TKO), Haidari Mchanjo (UD), Prince Mojesh Shrivastava (TKO), Eric Quarm (UD) leh Beruashvili (TKO) te a hneh tawh a ni.

Hmachhawp
Sangtea hi Grassroot Boxing Promotions and Management hnuaiah a awm mek. Grassroot Boxing dintu Mujtaba Kamal chuan, "Sangtea hi thla sarih dawn a inhnek tawh lo a, chumi a nih avang chuan inrintawkna a neih theih nan thiam takin a khingpui pawh kan thlang. Amah aia tawnhriat nei ṭha awlsam taka a hneh thei khan a ṭha ve tawk tih a pholang," tiin Vanglaini a hrilh.

Kamal chuan sawi chhun-zawmin, "Dubai-ah Sangtea hian kar ruk chhung international coach hnuaiah training a nei chhunzawm dawn a, December thlaa boxer ṭha zawk hmachhawn turin a inpuahchah zui dawn. World champion a nih theih hma kan la mek zel a ni," tiin Sangtea'n Mizoram a rawn la haw rih loh tur thu a sawi.

Sangtea hi WBC Youth champion a ni mek a, kum bithliah inelna tih hriat a ṭha. Tun ṭum Dubai-a inhnek hi title inchuhna a ni lo a, Beruashvili hi kum 26 mi a nih tawh avangin Youth title a chuh thei lo hrim hrim bawk.

A ropui e
Dubai Fight Night-ah hian main event atan WBO Cruiserweight African Championship title inchuh hman a ni a, bout 12 awmin Conrad Hotel, Dubai-ah inelna ṭha tak an buatsaih.

Cameroonian boxer Rolly Lambert Fogoum hian Ghanaian boxer John Napari lakah a title a humhim. BoxRec-a Indian boxer zinga record nei ṭha ber Faizan Anwar pawhin Octavian Gratii hnehin professional fight vawi kua a hmachhawnah a la chak vek.