Mizoram elpui tur Manipur
AIFF-in Santosh Trophy vawi 75-na qualifier fixtures a ti chhuak a, Mizoram chu Manipur nen group khatah an awm. SAFF Championship neih zawh taka India team-a player thawh tam ber state Manipur hian North East Zone qualifier group B an thleng dawn a, group khat aṭangin pakhat chauh an tling dawn.
Group B-ah hian Manipur leh Mizoram bakah Tripura leh Nagaland te an awm. Group dang zawk hi Meghalaya-in a thleng dawn; Meghalaya hi Assam, Sikkim leh Arunachal Pradesh te nen an awm ho a, India hmarchhak aṭangin team pahnih final round an lut ang.
Mizoram team hain September 27, Thawhṭanni aṭang khan Lammualah training an ṭan tawh a, player 50 vel zet koin tunah hian player 30-ah an thlifim tawh. State leh state inelna Santosh Trophy-ah hian ISL leh I League-a khel lai player an tel theih loh avangin player ṭha ṭhahnem tak thlan theih an ni lo.
Mizoram manager Lalenghluna (Maenga) chuan, "Kum hnih dawn kan in lockdown a, sports activity kan neih theih loh avangin player fitness a ṭha tawk lo. Mahse theihtawpin training kan nei a, player te pawh an phûr a, training ṭan hma minute 30 ah chuan ground ah kan kim ṭhap tawh ṭhin.
"Player naupang zawk, phur leh thiam tak tak kan hmu chho dawn niin a lang a, hei hian Mizoram football-ah phurna nasa tak a thlen ngei ka beisei. Kan naute ṭhenkhat hi Mizoram football lama kan la hmelhriat lem loh ni mah se, national camp lamah leh phai club lama tawnhriat lo nei tawh an nih hlawm avangin an rintlak hlawm hle," tiin Vanglaini a hrilh.
Covid-19 vanga Mizoram Premier League khelh theih a nih loh avangin coaching staff-in hna an ngah lehzual a, 'game plan' an luh hmain player fitness an tih ṭhat hmasak phawt a ṭul. Tun ṭuma Mizoram team enkawltu hi Samson Ramengmawia leh HC Zarzoliana te an ni.
Maenga chuan sawi chhunzawmin, "Tunah hian player 30 kan la kawl a, naupang rual karah senior player a mawi tawkin an inzep. Qualifying Round khel tur player 20 kan thlang fel hnai a, player an ṭhat hlawm avangin team enkawltute tan pawh player thlan har dawn khawp mai," tiin Mizoram squad a ṭhat thu a sawi.
Mizoram hi Santosh Trophy-ah vawi khat chiah an la champion a, kum 2014 khan coach H. Vanlalthlanga hoin Siliguri-ah nomawi an chawi. Hemi hnu hian ṭum nga Santosh Trophy hi khelh zawh a ni leh tawh. Mizoram hian vawi thum semifinal an lut a, ṭum khat group stage paltlang loin inelna hnuhnung berah final round an thleng zo lo.
Santosh Trophy NE Zone Qualifier
Group B : Manipur, Mizoram, Tripura, Nagaland
Venue : Khuman Lampak Stadium, Imphal
November 28, Pathianni
Manipur 9:30 AM Nagaland
Mizoram 2:30 PM Tripura
November 30, Thawhlehni
Tripura 9:30 AM Manipur
Nagaland 2:30 PM Mizoram
December 2, Ningani
Tripura 9:30 AM Nagaland
Manipur 2:30 PM Mizoram