Striker tel loa goal khung thiam Chelsea

Chelsea-in hliam vangin striker pahnih Romelu Lukaku leh Timo Werner chhawr thei lo mah se goal khung turin harsatna an tawh phah lo a, an mikhual Norwich City chu 7-0 ngawtin an sawp.

Blues tan Mason Mount chuan hattrick a siam a, Callum Hudson-Odoi, Reece James, Ben Chilwell leh Max Aarons (own goal) te chuan goal khat ṭheuh an khung bawk a, Chelsea an chak chiang hle.

Norwich tana result duhawm lohna belhchhah turin defender Ben Gibson chu minute 65-naah hnawhchhuah a ni a, Gibson-a'n a yellow card pahnihna a hmuh hma hian Chelsea hian goal nga an khung fel der tawh.

Chelsea-in hnehna an chan avangin Premier League table chung ber an luah chhunzawm zel a, an hnuaiah Brighton & Hove Albion sawptu Manchester City an awm - nizan inkhelah Liverpool-in Manchester United an hneh chuan Reds hi pahnihna an ni leh thung ang.

A pawi lo e!
Chelsea boss Thomas Tuchel-a'n striker a neih loh avangin Kai Havertz chu tlarhmaah false nine angin a khelhtir a, a sirah German forward thlawp turin Mount leh Hudson-Odoi a dah bawk.

German coach changrel a sual lo - Chelsea tlarhma pathumin Norwich an chhaih buai takzet a, Canaries lamin an nawr hleihtheih loh avangin Blues player-ten ball an keng rei ṭhin a, a tir aṭangin inkhel an thunun nghal.

Mount chuan minute riatna lekah goal hmahruai khungin goal khung hna a thawk ṭan a, mikhual team an insiamrem fel hmain Hudson-Odoi chuan minute sawm hnu lawkah an goal hnihna a rawn khung zui.

First half tawp nan minute thum chiah a awm tawh tihah Hudson-Odoi chuan goal khat a thawh ve leh a, chawlhlawk hman a nih hma hauhin chak tur a chiang fel tawh.

Team inthlau
Norwich-in second half ṭantir lamah bench aṭanga luhtir Milot Rashica hmangin Edouard Mendy rum ṭhaih ve zauh mah se a bak erawh Chelsea chanpual bawk a ni.

Chilwell-a'n defender goal khung thiam a ni tih pholangin minute 57-naah an goal lina a khung a, season ṭantira khelhna hmun chang lo fullback hian league match thum a khelhah goal thum a khung ta!

Chelsea-in goal khungpui mamawh lo mah se minute 62-naah Hudson Odoi-a cross aṭanga ball kal chu Aarons chuan an lamah a ti lut a, keeper Tim Krul a hawihai - Blues-in goal nga an khungna a ni der.

London club an chak dawn tih a chiang a, a chesual erawh Norwich bawk an ni. Gibson chu James laka a chet dan avangin a yellow card pahnihna pek a ni a, referee-in thutlukna dik a siam.

Hattrick hero Mount
Chelsea-in goal nga khung tawh mah se mikhual laka ṭhat chhuah tumna an nei lo. Hun tawp nan minute nga chiah a awm tawh tihah penalty an hmu a, Mount-a pet chu Krul-a'n dang mah se VAR hmanga ennawn a nih hnuah Dutch keeper hi English midfielder-in a pet hmain line a pel tih hmuh a ni a, penalty an pet nawn.

Mount-a'n a vawi hnihnaah chuan hlah loin a pet goal a, hun pek belhah a hattrick siamna goal a khung leh bawk - a goal hnuhnung zawk hi bench aṭanga luhtir Ruben Loftus-Cheek siamsak a ni a, goal dang lut loin Chelsea an chak.

Blues-in Norwich an hneh zan hi an vice chairman hlui, kum 25 liam taa Bolton Wanderers nen an inkhelh zawha helicopter chesuala thi Matthew Harding thih cham a ni a, hriatrengna hun an hman zanah an chak chiang hle.

Norwich pawhin warm-up naah an teammate Dan Barden hming chuanna t-shirt an ha a, kum 20 mi, loan-a Scottish Premiership cub Livingston-a khel mek keeper hi testicular cancer tih hriatchhuah a ni a, inenkawl turin football a chawlhsan rih mek.

Kan khel ṭha. Kan hriam a, theihtawp kan chhuah bawk. Na takin kan nawr a, ball kan chang tam a, kan khelh dan a fuhin chance pawh kan insiam hnem hle. Goal sarih em em khung tur chuan vanneihna bakah a kal fuh laklawh a ngaih chang a awm ve a, kan khelh ṭhatna erawh sawi bo theih a ni lo. Mahse, hei hi game khat chauh a ni a, Thawhlehni zanah Southampton nen League Cup last 16 kan khel lehnghal dawn. Ka player-ten fak an phu a, mahse, hei hi match khat chauh a ni tih theihnghilh loh a ṭha. - Thomas Tuchel, Chelsea manager