FRENCH OPEN ; Stan a ding zo lo
French Open champion tawh Stan Wawrinka tan kuminah hun ṭha a inher chhuak thei rih lo. Season hmasa Roland Garros finalist hian Thawhṭanni zan khan a match hmasa ber a khel a, world number 67 Guillermo Garcia Lopez lakah darkar thum leh a chanve chhungin 6-2, 3-6, 4-6, 7-6(5), 6-3 in a chak lo nghal.
Champion lai Rafael Nadal erawh Simone Bolelli nen set thumna an khelh laiin ruah sur vangin an khel zui thei lo a, French Open vawi 10 champion tawh Nadal hian 6-4, 6-3, 0-3 in hma a hruai mek. World number 1 hlui Novak Djokovic chuan Rogerio Dutra Silva chu 6-3, 6-4, 6-4 in a hneh thung.
Stan a tlu
Suzanne Lenglen Court-ah khup hliam dam hlim Wawrinka-a'n game hmasa pahnih la mah se set khatna a hloh nghal a, set hmasa berah hian injury timeout a mamawh zui bawk. Season hmasa chawhnu lam aṭanga a buai phah tawhna a khup vangin beisei angin a khel chhuak thei rih lo a ni. June 11-a world ranking chhuak tharah chuan number 256-naah a tla hniam dawrh tawh dawn.
Grand Slam vawi thum champion tawh Wawrinka chuan, "Ka khup hliam hmasa kha chu a ṭha tawh. Natna dang ka neih belh zel rih hi ka dam fel vek a ngai. Ranking hian kan nihna dik tak a tarlang a, tournament ṭhenkhatah chuan wildcard ka mamawh hial dawn. Mahse, ka tawnhriat neih tawh aṭangin thawhchhuah leh ka tum ang," a ti.
Switzerland tlangval Wawrinka hi kum 33 mi a ni tawh a, a vanglai pelh hnuah hliam vanga a buai tak fo avangin tho chhuak leh tur chuan a thawhrim a ngai hle ang. Hnehna changtu Lopez pawh hi kar leh maia kum 35 tling tawh tur a ni. Spanish player hian clay court-ah nomawi vawi thum a chawi tawh a, clay-ah hian Wawrinka lakah vawi thum hnehna chang tawhin ṭum hnih a chak lo thung.
Hei le Novak
Grand Slam vawi 12 champion tawh Novak Djokovic-a'n second round lut turin harsatna tlem a tawk. World number 134 Rogerio Dutra Silva lakah Djokovic hian a service vawi thum ngawt a hloh a, a kiu hliam a dam hnuah khel ṭha chho leh tawh viau mah se tun hma lama a service leh forehand na tak ang kha chu a la nei let rih lo.
Kum 31 mi Djokovic hian 2016 khan Paris-ah hian nomawi a chawi a, a hnuah Grand Slam champion a la ni leh lo. Season khat liam hnuah beiseina a nei chho leh mek a, thlen san a duh a nih chuan Brazil tlangval Silva laka tih sual a ngah (36 unforced errors) ang kha a insiamṭhat ran a ngai ang.
Serbian tlangval Djokovic chuan, "Hnehna nen bul ṭan hi ka tan a ṭha hle. Silva khan ball a vaw vir nasa em em a, dawnsawn dan pawh thiam a har hle. Ka ṭhat dan leh duhdan takin khel chhuak thei rih lo mah se tun ṭum atan chuan set thum chhunga hnehna chan theih hi a ṭha," a ti. Djokovic hian second round-ah chuan Spanish player Jaume Munar a hmachhawn leh dawn.
Inkhel dang
Seeded pasarihna Dominic Thiem chuan Ilya Ivashka chu 6-2, 6-4, 6-1 a hnehin second round a inhlangkai ve bawk a, Austrian tlangval Thiem hian world number 39 Stefanos Tsitsipas a hmachhawn leh ang.
Kum 24 mi Thiem hi clay court-a inkhel thiam tak mai a ni. French Open inbuatsaihna pakhat Madrid Open quarterfinal-ah pawh Nadal a hneh thei–tun season chhungin clay-ah bik Nadal hneh thei awmchhun a ni hial.
Thawhṭan zan mipa singles inkhel dangah Richard Gasquet leh Sam Querrey ten hnehna an chang bawk a, he tih lai hian seeded chang phak zinga mi Gilles Muller leh Philipp Kohlschreiber te bakah hming langsar dang David Ferrer te erawh an chak lo thung.