Training match-ah Neuer a inlan

World champion Germany chuan an training-na hmun Eppan, Italy-ah Under 20 team an hmachhawn a, 7-1 in an hneh. Inhliam vanga hun rei tak inlan tawh lo Manuel Neuer pawh minute 30 chhung a khel a, harsatna a nei lo.

DieMannschaft tan hian Leroy Sane-a'n goal hnih a khung a, Julian Brandt, Leon Goretzka, Joshua Kimmich, Nils Petersen leh Mario Gomez ten goal khat ṭheuh an khung a. Friendly match hi minute 30-30 a khelh a ni a, entu awm loa khelh a ni.

Bayern Munich keeper Neuer chuan, "Ka fitness a ṭha a, coach te pawh an lungawiin ka hria. Fitness coach ten dinhmun ṭha takah min dah a ni," tiin World Cup hnuhnung bera best keeper chuan Russia rama a inlan theih ngei a beisei thu a sawi.

Germany hi Group F-ah Mexico, Sweden leh South Korea te nen an awm ho a, Inrinni zan dar 9:30 hian Worthersee Stadion-ah Austria nen friendly match an khel ang.