A pawimawh hunah Golden State

NBA champion lai Golden State Warriors chuan regular season-a team ṭha ber Houston Rockets chu an arena Toyota Center-ah nimin zing khan an luhchhuah a, Western Conference game 7-ah 101-92 a hnehin finals an lut.

Steve Kerr-a'n a kaihhruaina hnuaiah Golden State chu season li chhung NBA Finals-a luhpui a, ṭum dang ang thoin Cleveland Cavaliers an hmachhawn dawn. Game 1 hi Zirtawpni zing dar 6:30 hian Oracle Arena-ah khelh a ni ang.

3-pts luh harsat Rockets
Houston Rockets-in halftime-ah 54-43 in hma an hruai a, second half-ah erawh lut thei si lo a 3-points zunzam aṭanga an talchhuah theih loh avangin Golden State an chungnung.

Rockets hian third quarter-ah 3-points luh tumin vawi 14 attempt an nei a, an lut lo vek. Fourth quarter nena chhut telin vawi 27 zet a zawnin a lut lo a, NBA playoff history-a lut lo zawn rei ber record an siam. Hun engemaw lai chuan vawi 30-ah vawi khat chauh an lut a, game 7-ah bik hian vawi 44-ah vawi 7 chauh lutin chu chu 15.9 percent chauh an lut.

Arc pawn lama an luh theih loh viau lai hian 2-points chin aṭang chuan vawi 46-ah vawi 29 an lut a, 63 percent lai an luh phak avangin second half-a point thum kher neih an tum lai hi hriatthiam har lai a ni a, an chak lohna chhanah a ngaih theih.

Rockets coach Mike D'Antoni chuan, "Golden State-in 16/39 an luh laiin keini erawhin 7/44 chauh kan tlin a, hetah hian engkim a chiang. An rawn chet ṭhat deuh khan 3-points lut ve zel ila a dik tur a ni a, kan lut thei miau si lo," tiin an vanduai ni an tawn thu a sawi a, an khelh dan hmangah erawh inchhirna a neih loh thu a sawi.

KD leh Curry
Houston ang lo takin Golden State erawhin 3-points luh an harsat ve lo a, second half-ah 3-points vawi 18 luh an tum aṭangin vawi 10 an lut. Kevin Durant chuan harsatna nei loin feet 31 aṭangin a khung a, Curry chuan awlsam hmel takin 22, 26 leh 28 feet aṭangin a lut ve bawk.

Inkhel khaikhawmna ṭha tak chu stage sangah Golden State player-te theihna a sang zawk a; Kevin Durant, Stephen Curry, Klay Thompson leh Draymond Green telna team hun pawimawhah an dang.

Curry chuan, "Hetiang dinhmun harsa takah hian kan la ding ngai lo a. Basketball hi minute 48 khelh tur a ni a, eng ang pawhin khel chhia ila, thlak danglam turin hun a awm reng a ni. Kawng harsa kan paltlang theih avangin kan hlim hle," tiin a sawi a, champion nawn ngei an tum thu a sawi lang tel bawk.

Golden State coach Steve Kerr chuan, "Halftime-ah dressing room-ah ka lut a, 'Kum li chhung kan awm ho a, tuna ka hmuh team erawh ka hmelhriat an ni lo' tiin ka zilh. Amaherawhchu second half-ah erawh ka player theihna sang ten danglamna an thlen a, Stephen Curry, Kevin Durant leh Klay Thompson te kha an chelh lo a ni," tiin team ṭha zawk an chak thu a sawi.

Kerr hian game 5-a an chak loh zawhah Houston lakah 3-2 in hnufual chiah mah se hlauhthawnna a neih loh thu a sawi a, game hnuhnung pahnih chakzuiin NBA Finals an lut a. Golden State hian finals-a an khingpui tur Cavaliers hi an intawn hnuhnung pathumah vawi hnih an hneh theih avangin tun ṭumah pawh hian rinkai zawk an ni ang.