Wozniacki leh Kvitova an tlang

French Open khelh mekah hmeichhe player langsar Caroline Wozniacki leh Petra Kvitova te chuan an match hmasa berah fiahna hautak an tawk nghal a, Thawhṭanni khan harsa takin second round an inhlangkai hram.

Philippe-Chatrier-a inkhelah seeded pahnihna Caroline Wozniacki hian Danielle Collins chu 7-6 (7/2), 6-1 in a hneh. Australian Open champion Wozniacki-a’n tun hmain Roland Garros-ah hian semifinal a la thleng phak ngai lo a, kuminah pawh rinkai ber a ni phak lo.

Kum 27 mi Wozniacki hi set khatnaah talbuai deuh mah se a insiamṭha thuai a, a vawi khat nana French Open kheltu Collins tan hneh theih a la ni lo. A match lehpekah chuan world number 219 Georgina Garcia Perez a hmachhawn ang, a champion thei a nih chuan Simona Halep lehpelin number 1 a ni thei dawn.

Seeded pariatna Petra Kvitova pawhin set hmasa ber a hloh hnuah Veronica Cepede Royg chu 3-6, 6-1, 7-5 in a hneh let thei hram. Czech Republic nula hian set khatna lekah hian unforced errors vawi 17 ngawt a nei a, set hnuhnung pahnihah erawh a insiamṭha thei.

Hmeichhe singles inkhel dangah Indian Wells nomawi chawitu Naomi Osaka pawhin hnehna a chang. Japan nula Osaka hian second round lut turin Sofia Kenin chu 6-2, 7-5 in a hneh.

World number 1 hlui Victoria Azarenka erawh 2013-a final a khelh tawhna hmunah a che fuh lo, rinkai nichungin inlan mah se kum 22 mi Katerina Siniakova lakah 7-5, 7-5 in a chak lo. Seeded 20-na Anastasija Sevastova pawh 4-6, 6-1, 6-3 in Mariana Duque-Marino lakah a tlawm. Grand Slam vawi nga champion tawh Maris Sharapova erawh khua in a bumro avangin a inkhelh hun sawn sak a ni.