France an chak nuamsa

World champion nih inbeisei France chuan World Cup khel tura an inbuatsaihna friendly match-ah Republic of Ireland chu 2-0 in an hneh a, Olivier Giroud leh Nabil Fekir ten goal khat ve ve an khung.

France-in inkhel ṭantir aṭangin game an thunun a, Giroud-a’n a ball tauh an dan per hnuah a let lehlam chu hmahruaina goal ni turin minute 40-na lekah a khung. Minute thum a liam a, Irish goalkeeper Colin Doyle-a’n Loris Karius tih dan entawnin an lamah a nam per lut a, he goal hi Liverpool nena sawizawm Fekir-a pet a ni.

Les Bleus-in World Cup inpuahchah nan match hnih khelh tur an la nei a, Zirtawpni zanah Italy nen friendly match an khel ang a, June 9 zanah USA nen an inkhel leh ang.

Giroud a ‘form’
Arsenal-in duh lo mah se Chelsea-ah FA Cup nomawi a chawi zui a, season a tawp meuh chuan France tan striker pawimawh a ni. Kum 31 mi striker hian Les Bleus tana a chet ṭhat a chhunzawm zel a, ram tan goal 31 a khung ta.

Giroud hian heti zat goal khung tur hian match 72 a mamawh a, ram tana goal khung hnem lamah Real Madrid legend Zinedine Zidane a nihrual chiah a, a chunga awm David Trezeguet (34), Michel Platini (41) leh Thierry Henry (51) te zingah Trezeguet leh Platini hi chu a umphak theih mai a rinawm.

France ‘enchhinna’
Les Bleus-in World Cup an chawi hmasak ber leh hnuhnun ber ni bawk chu 1998 daih khan a ni tawh a, kum 20 a liam tawh. Russia-ah player langsar tak tak Kylian Mbappe, Ousmane Dembele, Paul Pogba leh Antoine Griezmann te hruai chungin champion an beisei dawn.

France coach Didier Deschamps-a’n Ireland in enchhin nan a hmang a, 4-3-2-1 formation-ah Giroud chu striker mal tlat a ni–78% possession nei chungin goal-ah vawi 17 shot an nei a, World Cup-ah he formation tho hi hmangin Giroud chu tlarhmaah a maltlat a rinawm.