Spain inbuatsaih ngawrh

World Cup boruak a lian chho mek a, player ṭha rual awmkhawmna Spain chuan inbuatsaihna an nei ngawrh chho tawh hle. Thawhṭanni khan Spanish Football Federation hmunpui Las Rozas-ah training an nei.

Spain hi world champion lai ni chungin 2014 Brazil World Cup-ah an inlan a, mahse group stage pawh paltlang loin an zinkawng a tawp. South America lama an sulhnu ṭha lo tak kha Russia-ah hliahkhuh an tum dawn a ni.

Julen Lopetegui-a enkawl Spain squad-ah hian Atletico Madrid striker Diego Costa a tel a, Europa League champion puitu Costa hi player pawimawh ni phak tura ngaih a ni. Japanese club Vissel Kobe tana khel tawh tur Andres Iniesta tan World Cup hnuhnung ber a ni tawh dawn a, Barcelona captain hlui bakah hian Arsenal defender Nacho Monreal tan pawh hun hnuhnung a ni thei ang.

Champions League champion Real Madrid captain Sergio Ramos bakah Nacho, Dani Carvajal, Marco Asensio, Isco leh Lucas Vazquez te chu chawlh pek rei bik an nih avangin an ram squad an la zawm ve lo. La Liga champion Barcelona defender Gerard Pique leh Sergio Busquets te chuan an ṭhiante an zawm tawh thung.

Spain hian World Cup inbuatsaih nan Pathianni hian Switzerland nen friendly match an khel dawn a, Russia an pan hmain Tunisia nen an inkhel leh bawk ang. World Cup-ah chuan Portugal, Iran leh Morocco te nen group stage-ah an inkhel dawn a ni.