Son-a goal hmangin South Korea chak
FIFA World Cup 2018 atan ram hrang hrang an inkulh hrang a, friendly match a awm chho ṭan bawk. Thawhṭanni zan khan Daegu Stadium-ah mualneitu South Korea-in Son Heung-min leh substitute Moon Seon-min te goal hmangin 2-0 in Honduras an hneh.
Thlirna Tawi
Honduras lakah South Korea-in inkhel an thunun nachungin first half-ah goal a lut lo. Minute 60-naah Son Heung-min-a'n yard 25-na aṭangin nalh zetin goal hmahruai a khung a, Incheon United winger Moon Seon-min-a'n ram tana a inlan vawi khatnaah chak nemnghehna goal a khung.
South Korea captain Ki Sung-yeung a inlan loh avangin Tottenham forward Son chuan captain armband a hreng a, ram tana a goal 21-na niin a siamsaktu Lee Seung-woo-a'n ram tana a khelh vawi khatnaah assist a nei nghal. Kum 20 mi Lee hian 2011 khan Barcelona youth system a zawm a, La Masia aṭanga inzir chhuak niin Barcelona B team tan vawi khat a inlan hman a, hemi hnu hian Italian club Verona zawmin season liam ta khan vawi 19 a inlan.
Shin-a hote
South Korea hian July 2017 khan Uli Stielike banin coach atan Shin Tae-Yong an lalut a, World Cup khel turin a hruai thleng hram. South Korea han World Cup qualifying round vawi 14 an khelh tawh aṭangin vawi kua an tling a, a thlen san ber chu kum 2002-a inelna an thlen kum kha niin palina an ni.
FIFA ranking-ah 61-naah awm mekin South Korea hi champion lai Germany bakah Mexico leh Sweden te nen Group F-ah an awm ho a, knockout stage thlen a harsa dawn. Amaherawhchu World Cup atana warm up match hmasa ber an khelh dan a lungawi thlak a; May thla khan defender Kim Min-jae, midfielders Yeom Ki-hun leh Kwon Chang-hoon bakah striker Lee Keun-ho te inelna hmachhawn thei lo tura an inhliam avangin an result hi a lawmawm lehzual.
South Korea awmpui Mexico erawh Gareth Bale-a tel lohna Wales nen goal awm loin an inhnehtawk ve bawk. Taegeuk Warriors hian Zirtawpni zingah Bosnia and Herzegovina nen kum 2002-a World Cup khelhna stadium Jeonju-ah an inkhel ang.