Conte ni loin board thiam loh a ni - Gullit

Chelsea boss hlui Ruud Gullit chuan Blues chetchhiat chhan chu Antonio Conte ni loin Chelsea board an nih thu a sawi.

Netherlands assistant manager chuan, "Kei chuan Conte hi ka dem lo. Ban a nih tur thu thuthang kan hre reng a, he boruak karah hian an coach chhan turin board lamin thu leh hla an nei lo hrim hrim.

"Board berin thuchhuah an neih loh chuan club coach ber chu dinhmun chiang lo angin a awm reng a, hei hian dressing room-ah nasa takin nghawng a nei ṭhin a ni.

"Player khel mekte pawhin coach mit tlung taka awm an tum hran lo a, a khel phak lote pawhin an coach chu chhuak mai tura an ngaih avangin a rilru hmin tumna an nei lo," a ti a, board-in thuchiang an neih loh chu team-in an tawrh thu a sawi.

Gullit hian 1996-98 inkarah khan Chelsea a enkawl a, 1997 khan FA Cup-ah a champion pui. Chelsea hi coach ban lamah mi thar an ni lo, Premier League-a hming chherpuitu Jose Mourinho meuh pawh an ban a, Champions League nomawi chawipuitu Roberto Di Matteo pawh an dim chuang lo.

Dutch manager Gullit chuan fiamthu thawh zuiin, "Chelsea-ah nomawi in chawi chuan in dinhmun a derthawng tihna a ni. Claudio Ranieri khan Blues tan eng nomawi mah a chawi lo a, mahse kum li a awm. Stamford Bridge-a awm reng duh chuan nomawi chawi loh a him ber," tiin a sawi!