Portugal chak zo lo

Friendly match hi tehna atan kan hmang dawn a nih chuan Portugal tan world champion nih a la hla rih - Europe cham­pion hian Tunisia lakah si hnih faia hma an hruai reng hnuin an sut zawh tir a, 2-2 in an inhnehtawk.

Portugal tan hian Andre Silva leh Joao Mario te chuan minute 35 chhungin goal hnih an khung a, Tunisia lakah awlsam takin an chak dawn niin a lang. Mahse, World Cup atana inbuatsaih ve tho Tunisia-in ngaihthah chi an ni lo tih an pholang.

Anice Badri chuan an goal hnihna an chhuah aṭanga minute nga hnu lawkah an si phurh a sut ṭhen a, Fakhreddine Ben Youssef chuan minute 64-naah a sut zo.

Portugal hi World Cup-ah Group B-ah Mo­rocco, Spain leh Iran te nen an awmho a, Tunisia laka an khelh dan en chuan an hna a awlsam dawn lo tih a lang nghal.

Hriat tel atana ṭha erawh European cham­pion hi an captain Cris­tiano Ronaldo tel loa khel an ni a, Real Madrid forward hi Spanish club tana Champions League final khel chau a nih avangin chawlh hahdamna hun pek a ni.