East Bengal hmingah Kingfisher tel dawn lo

Kolkata club lian East Bengal chuan an thawhpui hlun Kingfisher-in an beisei ang zat pawisa an pek theih loh avangin chief sponsor an nih tawh loh tur thu an puang a, an hming hma lama Kingfisher tih an dah ṭhin chu an dah tawh dawn lo.

May 9 khan Kingfisher neitu United Brewery (UB) Group thuneitute leh East Bengal club thuneitute hi an indawr a, Kolkata club lamin season dang aia pawisa tam zawk an beisei laiin UB lam hian an dawn ṭhin pangngai aia vaibelchhe hniha hniam in contract an lo ziahpui.

Kingfisher hian season hmasa khan East Bengal hi vaibelchhe 3.5 an pe a, kuminah erawh vaibelchhe 1.5 chiah an pek tur thu an sawi. Kolkata club thuneitute chuan chief sponsor sum atan chuan heti zat lek hi beitham an ti a, co sponsor angin an kaltir ta zawk dawn a ni.

East Bengal general secretary Kalyan Majumder chuan, "UB group hian min sponsor chu an chhunzawm reng dawn tho a, mahse an sum min pek tur hi a beitham deuh avangin main sponsor ang chuan kan kal tir thei lo a ni," a ti.

Hetihlai hian East Bengal hotu lian zinga mi Debabrata Sarkar chuan an sum dinhmun tifel turin main sponsor neih thuai tuma hma an lak thu a sawi.