Liverpool-in Fabinho an lalut

Nipui transfer bazar-ah Liverpool thawm a lian nghal a, Monaco midfielder Fabinho chu pound maktaduai 40 bawr vel thlenga a man sang chho thei turin Merseyside club hian an lalut.

Anfield-a June 2023 thleng cham tura contract ziaktu midfielder man zatah hian Liverpool chuan pound maktaduai 39 an pe phawt ang a, a khelh ṭhat dan a zirin pound maktaduai li an pek belh ang.

2017 nipui laia Manchester United pawhin lakluh tuma an lo hel tawh midfielder chuan, "Team lian tak ka zawm a, hei hi tun hma aṭanga ka duhthusam ram lo ni tawh chu a ni. Ka phur takzet," tiin Liverpool a pan hnuah a sawi.

Khawi hmunah pawh!
Liverpool midfielder Emre Can chuan Anfield-ah a contract a hmang zo tawh dawn a, Juventus a pan dawn nia sawi a awm avangin Fabinho hi Can thlakna tur anga ngaih a ni.

Brazilian midfielder hian right back angin a career ṭan mah se defensive midfield chu a hming chherna atana a hman a ni. Reds manager Jurgen Klopp chuan, "Inelna sangah pawh position hrang hranga khel turin rilru huaisen tak leh theihna a nei a ni. Number 6, 8 leh 2-ah a khel thei vek a, a ṭha takzet," a ti.

Fabinho chuan, "Hetiang ang club lianin min duh tih hriat kha chuan he hmun pan tur hian ngaihtuahna sen buai vak a ngai lo. He club-ah hian thawnthu thar duhawm tak ziah ka tum ang a, he club nen hian nomawi kan chawi ka beisei a ni," tiin a sawi.

Player ṭha bik
Fabinho hian Brazilian club Fluminense-ah a career ṭanin Rio Ave a zawm a, Portuguese club aṭang hian Real Madrid chu loan-a a zawm hnuin 2013 khan Monaco chu loan bawkin a pan leh a, May 2015 khan French club hian a nghetin an lalut ve chauh.

Monaco tan 2016-17 season-a league nomawi an chawi ṭumin player langsar a ni a, Ligue 1 club tan hian inelna hrang hrangah match 225 khelin goal 29 a khung sak. Season hman zawh takah khan match 46 a khelh sak a, goal riat a khung. Brazil World Cup squad-a koh zingah erawh a tel lo.

Klopp chuan, "Player ṭha tak kan lalut a ni. Hemi piahlamah hian a mihring mihrinnaah pawh mi ṭha tak a ni a, dressing room leh training-naa kawl nuam tur tak player a nih thu min hrilh zel a ni," a ti a, an player thar chu khelmual pawn lamah pawh entawn tur chi a nih thu a sawi.

Transfer bazar
Liverpool-in Fabinho an lakluh thu an puang a, Brazilian defensive midfielder bakah hian Naby Keita chu season thara Liverpool player tur chiang a ni. August 2017 khan Reds hian Keita hi lalut turin RB Leipzig chu inremna an lo neihpui tawh.

Pound maktaduai 48 man Keita leh 40 chuang man Fabinho Reds-in an nei tawh a, Lyon playmaker Nabil Fekir chu Merseyside club nena sawizawm mek an la ni bawk. Fabinho chuan, "Fekir hian tun season mai ni lo season dangah pawh a theihna a lo pholang tawh ṭhin a, Anfield-ah a lokal ve a nih chuan a ṭha ngawt ang," a ti.

Khawthlang media te chuan Liverpool hian tun kar chhungin Fekir hi inbiakna neihpui an tum niin an sawi a, Roma goalkeeper Alisson Becker chu an mualpho ṭhinna hup bo tura lakluh an tum niin sawi a awm bawk.