George Weah fapain US tan goal khung

AC Milan leh Liberia striker ropui George Weah-a fapa Timothy Weah chuan USA tana international match bul a ṭan hmasak berah goal a khung a, Bolivia lakah US hi 3-0 in hnehna a chanpui.

USA tan hian Los Angeles FC defender Wal­ker Zimmerman chuan goal hmahruai a khung a, Josh Sargent leh Timothy Weah ten goal khat ve ve an khung bawk. Sargent hi Weah ang thoa kum 18 mi a ni a, Werder Bremen tan a khel mek. Player pahnih hi nikuma FIFA Under 17 World Cup India-in a thlen ṭum khan squad-ah an awm ve ve.

Weah hian Paris Saint-Germain tan a khel mek a, season hman zawh takah khan French club tan hian league match thumah a inlan ve a ni. US tana inkhel bul a ṭan hmasak berah Weah hian goal khung nghal mah se a pa hnungzui tur erawhin hmabak a la ngah hle.

George Weah hian player a nih lai khan Mo­naco, PSG, AC Milan, Chel­sea, Manchester City leh Marseille-ah te a khel hman a, 1995-ah phei kha chuan Ballon d'Or chawi­mawina hial a dawng. Football lam kalsanin Libe­ria ram President a ni mek.

USA hi kumin World Cup-ah an inlan dawn lo a, October-a coach Bruce Arena a ban hnuah Dave Sarachan chu coach lailawk atan ruat a ni a, kum 63 mi coach hian team thar din a tumna kawngah player naupang tak tak a ko.

Sargent leh Weah bakah hian kum 20 mi Everton defender Antonee Robinson chuan USA tan inkhel bul a ṭan bawk a, US starting line-up kum chawhrual hi kum 22 leh ni 160 a ni.