FRENCH OPEN ; Nadal-a'n Bolelli beiseina a titawp

French Open bikah chuan tumahin Rafael Nadal hmachhawn an chak lo tawp ang. World number 1

Nadal hian Thawhleh zan khan first round a khel zo ve chiah a, player thawkrim tak Simone Bolelli chu 6-4, 6-3, 7-6 (11-9) in a hneh. Nadal hian zaninah Guido Pella a hmachhawn leh dawn.

Roland Garros, Paris-ah Juan Martin del Potro, Marin Cilic leh John Isner te pawhin hnehna an chang. Nizan khan Novak Djokovic leh Alexander Zverev ten second round an khel a; seeded 20-na Djokovic hian Jaume Munar a hmachhawn a, seeded 2-na Zverev leh Dusan Lajovic te an inkhel a, he thu buatsaih lai hian result kan hre hman lo.

Hei le Nadal
Seeded pakhatna Nadal leh Bolelli te hi Thawhṭan zan khan an inkhel tawh a, set hnih khel zo hmain Nadal hian 6-4, 6-3 in a la. Mahse, set thumnaah Nadal-a'n a service hlohin world number 129 Bolelli hian 3-0 in hma a hruai hman.

Ruah sur vangin khelh chhunzawm theih a ni lo a, Thawhleh zan khan set thumna aṭang hian khelh chhunzawm leh a ni. Philippe Chatrier-ah Nadal a tho chhuak nghal mai bik lo, tie break thlen puiin hetah hian 6-3 laiin hnufual hman mah se a tawpah 11-9 in a lehthal.

Hneh theih loh?
Clay court inelna lianah hian kum thum liam ta khan Nadal hian Djokovic lakah set a hloh ve a, chumi hnuah set a la hloh leh eih lo. Vawi 10 a champion tawhna hmunah hian match 25 chhung chu set hloh miah loin a kaltluang tawh. Paris-ah hian match 82 a khelh tawh zingah vawi 80 zet chu hnehna a chang a ni.

Grand Slam vawi 16 champion tawh Nadal hian kuminah French Open nomawi a chawi leh a nih chuan, Australian hranghlui Margaret Court-i record lo siam tawh a nih rual dawn a, major tournament pakhat bika champion hnem ber (11 titles) a ni ang.

Kum 31 mi Nadal chuan, "A nihna takah chuan player huaisen leh tumruh tak nena inkhelh hi chu a awlsam ngai lo. A ball vuak ṭhenkhat dik lo tura ka ngaih a dik fo a, ka tan chuan na taka nawr let mai loh chu tih theih dang a tam lo," a ti.

Roland Garros vawi thum champion tawh Mats Wilander chuan Nadal inkhel chungchang sawiin, "Clay-ah chuan player ṭha leh ropui ber a nih zia sawi nawn a ngai lo.

"Eng tianga harsa pawh ni se set lak dan a hria, chutih rualin inelna hi chawlhkar hnih chhung neih a ni dawn a, a tawp lamah player langsar nen an la inkhelh dawn avangin match rei lo zawk a khelh nan a khingpui na taka nawr chungin hun rei lo tak chhunga hnehna chan dan a hriat a ngai dawn," a ti.

Inkhel dang
Juan Martin del Potro-a'n wildcard hmanga inlan Nicolas Mahut lakah beisei angin bul a ṭan fuh lo a, world number 116 lakah set hmasa ber a hloh hnuin 1-6, 6-1, 6-2, 6-4 in a chak. Argentine tlangval hian first round paltlang tur hian darkar hnih leh minute sarih a mamawh.

Kum 29 mi Del Potro hian 2009 khan French Open semifinal a khel tawh a, mahse Roger Federer a ngam lo. Paris-ah hian final a la lut ngai lo a, seeded pangana hi player ṭha tak ni mah se clay-ah chuan rinkai tak a ni rih lo.

Seeded pathumna Marin Cilic pawhin darkar hnih leh minute 13 chhungin James Duckworth chu 6-3, 7-5, 7-6 (7-4) in a hneh hram. US Open champion hlui hian tun hnai Grand Slam an khelh hnuhnung pathum zinga pahnihah final a lut phak a, tun ṭumah pawh hian player dang tana hmachhawn châkawm loh tak a ni.

Ball vaw na tak John Isner chuan a service ṭhat a chhawr leh ta. 6 ft 10 inch zeta sang Isner hian Noah Rubin lakah aces vawi 28 ngawt a vaw chhuak leh a, tie break vawi hnih an khelh hnuah 6-3, 7-6 (9-7), 7-6 (9-7) in hnehna a chang.

Season hmasa US Open pahnihna Kevin Anderson pawhin Paolo Lorenzi lakah set hloh miah loin hnehna a chang ve bawk. A vawi khat nana French Open seeded chang ve phak Kyle Edmund chuan Alex de Minaur hnehin second round a inhlangkai ve bawk a ni.