NBA Finals: Golden State Vs Cavaliers Zirtawpni zing 6:30-ah Game 1

NBA Finals-ah Golden State Warriors leh Cleveland Cavaliers te bawk an intawng leh ta a, kumin hi a zawna vawi li an inhmachhawnna tur a ni. Zirtawpni zing dar 6:30 hian Golden State home Oracle Arena-ah game 1 khelh a ni ang.

America rama infiamna lar American football, ice hockey, baseball leh basketball-a inelna sang berah tun ṭum hi team pahnih final-a kum zawna vawi li an inhmachhawn vawi khatna a ni. Final-a an intawn hmasak ber kum 2015 khan Steve Kerr-a enkawl Golden State chuan 4-2 in hnehna an chang a, Cavs-in coach atan Tyronn Lue lalutin coach thar thluak leh LeBron James-a ṭhatna hmangin 4-3 in an chak.

Nikum khan Golden State-in Kevin Durant an lalut a, club thar hi champion pui nghalin MVP atan thlan a ni a. Stephen Curry, Klay Thompson, Andre Iguodala leh Draymond Green te telna team ṭha tawh sa chu Durant hian a tih ṭhat belh a, tun ṭumah pawh hian chak tura rinkai zawk an ni.

Cavs-in conference finals an thlen theih nana player ṭangkai LeBron James hi Golden State lamin an venbik a rinawm a, a vengtu tur bera ngaih theih Andre Iguodala chu Houston Rockets nen an inkhelh ṭuma hliam tenau a tawrh avangin Game 1 atan a dinhmun a chiang lo. Iguaodala a inlan thei lo a nih chuan Draymond Green-a mawhphurhna a sang sawt ang.

Chutihrualin Oracle Arena-a khelh tur a nih dawn avangin Golden State dinhmun a ṭha zawk a, Steve Kerr-a hote hi champion tur pawha rinkai an ni.