United-in Porto full back an rim

Manchester United-in nipui transfer-a an player lak hmasak ber ni turin FC Porto defender Diogo Dalot an hnaih zel a, kum 19 mi hi Antonio Valencia thachhang dawl tur leh thlakna nghet ni thei tura ngaih a ni.

Dalot-a release clause hi euro maktaduai 20 (£17.5m) a ni a, tun dinhmunah Manchester United hian Portuguese right back hi an la lei chhuak lo a. Chutihrualin club pahnih te hi an indawr tawh a, an inrem ngei a rinawm tawh zawk.

Porto aṭanga inzir chhuak Dalot hian Portugal tan age category hrang hrang U15 aṭanga U21 thlengin a khel vek tawh a, nikuma neih FIFA U20-ah pawh ram tan inlanin quarterfinal-a an tlak thlengin a khel kim vek a. Hemi hma hian Euro U17 C'ship 2016-ah an ram a champion pui a, Euro U19 C'ship 2017-ah pahnihna nihpuiin inelna pahnihah hian team of the tournament-ah a tel ve ve.

Nikum October 13 khan Porto tana a match hmasa ber chu Portuguese Cup 'Taca de Portugal'-ah a khel a, khualmualah Lusitano GC chu 6-0 in an sawp. An ram league sang ber Primeira Liga-ah erawh kumin February 18 khan inlanin minute 75-ah bench aṭangin a lut a, Rio Ave FC chu 5-0 in an sawp. Porto-in league an champion theihna turah vawi ruk a inlan.

Dalot hi midfield leh left back-ah a khel thei bawk a, Porto-in March thlaa Liverpool nen Anfield-a goal awm loa an inhnehtawk ṭumin a khel tluan a, amaherawhchu Estadio Dragao-ah 5-0 an chak loh avangin Champions League last 16 aṭangin an tla. Kum 19 mi chauh a nih avangin Dalot tan zir tur a la tam a, Valencia nen khelhna hmun an inchuh ang.

United-in Dalot-a hming an sawi rik takah chuan Matteo Darmian-a dinhmun a chiang lo lehzual a, Italian defender hi season liam taah pawh khan khelhna hmun a chang tam tawh lo. Manchester United hian Michael Carrick thlakna turin Shakhtar Donetsk aṭangin Fred lakluh theih an inbeisei a, Real Madrid-a Gareth Bale-a dinhmun an zirchiang mek bawk. United boss Mourinho hian Tottenham defender Toby Alderweireld a ngaihven nia hriat a ni bawk.