Nomawi kan tiam thei lo, Match ropui kan pholang dawn - Thiago Silva

Brazil captain Thiago Silva chuan World Cup nomawi an chawi ngei dawn tia a tiam theih loh thu a sawi a, hetihrual hian match ropui tak an khelh tur thu erawh a sawi thung.

World Cup hnuhnung ber, 2014 World Cup-ah khan Brazil hian semifinal-ah 7-1 in Germany chu an hneh lo a, mahni ramah Selecao an mualpho.

Silva chuan, "World Cup-ah kan inlan leh dawn ta a, thawnthu ziak danglam turin hun ṭha kan nei a ni," a ti a, 2014-a an mualphona chu 2018-ah khuh bo an tum tur thu a sawi.

Hmasawn Brazil
Paris St-Germain defender chuan, "Dunga hoin he World Cup khel tur hian kan inbuatsaih a, a hnuah Tite hoin kan inbuatsaih leh a, he kum hnih chhung hian nasa takin hma kan sawn hman a ni," a ti.

Brazil hian Dunga enkawlna hnuaiah qualifier match ruk khela vawi hnih chiah hnehna an chan theih avangin an ram captain hlui hi a hna aṭangin an chawlhtir a, Brazilian club lian Corinthians-a nomawi chawi theih zawng zawng lo chawi tawh coach Tite ruat a ni.

Tite enkawlna hnuaiah Brazil-in nasa takin hma an sawn a, Dunga hnua qualifier match 12 an khelhah tlawm hmel an hmu tawh lo. Match 12-ah hian goal 30 an khung a, an lamah goal thum chiah a lut thung–Silva'n dawt a sawi lo.

Match ropui
Brazil lakah mipui beiseina a sang a, vawi nga champion tawh team hi an ram mipuiten World Cup nomawi nena kir turin an beisei. Silva chuan nomawi meuh erawh an tiam theih loh thu a sawi thung.

Kum 33 mi defender chuan, "Nomawi kan tiam thei lo a, ṭha takin kan khel ang tih erawh ka tiam thei. World Cup a thlen meuh chuan football hmuhnawm tak in hmu ang tih ka tiam che u a ni," a ti a, nomawi chawi tur chuan vanneihna a ngaih tel thu a sawi.

Brazil hian 1958, 1962, 1970, 1994 leh 2002-ah te World Cup nomawi an chawi tawh a, world champion ni ngun ber an ni. He record an chelh hi dinhmun derthawng takah erawh a awm mek. Champion lai Germany chu vawi li an champion tawh a, kuminah pawh champion tura beisei kai zinga mi an ni.

100% lo Neymar
Brazil hian London khawpuiah, Tottenham Hotspur training ground thar hawhin an inzir mek a, hliam vanga inkhel thei lo reng Neymar chuan an ram team training hi a zawm tawh. 100% a in fit erawh a la ni lo thung.

Khawvela footballer manto ber chuan, "100% in ka la in fit lo a, World Cup-a inlan tur erawhin kan inpeih hman ang," a ti. Kum 26 mi forwrad hian a ke dinglamah zai a tawk a, PSG tan season tawp pawh a khar ve thei lo.

Barcelona forward hlui chuan sawi zawmin, "Ka theihna zawng zawnga inkhel chhuak leh nghal tur chuan ka hlauthawng deuh a, mahse World Cup hma erawhin ni engemaw zat kan la nei a ni," a ti.

Captain Silva?
Brazil-in 2015 Copa America-ah khan Thiago Silva chu captain nih tir tawh loin Neymar hnenah captain armband pek a ni a, hetih hunlaia an coach chu Dunga a ni.

Tite-a'n Brazil a enkawl hnuah captain nghet nei loin a chhawr kual ṭhin a, Neymar chu captain armband hreng ngun ber ni mah se Brazilian coach hian captain dinhmun hi a siksawi ve reng.

Kumin World Cup-ah pawh Neymar hi captain ni tura beisei a ni a, mahse Thiago Silva hian Thawhlehni zan khan Brazil captain nichungin press conference a hmachhawn.

Tichuan...
Silva-a'n Brazil captain nichunga media a hmachhawn avangin khawthlang media-te chuan PSG defender hi Brazil captain a nih thu an ziak a, official taka puanchhuahna erawh a awm lem lo.

Brazil hian Pathianni zan dar 7:30-ah Croatia chu Anfield-ah friendly match an khelhpui dawn a, June 10 zanah Austria nen an inkhel leh bawk ang.

World Cup hmain Neymar a inlan thei dawn lo a, match hnihah chuan Silva hi a captain dawn chiang a, Neymar-a'n match hnih a khelh dawn loh avangin Russia-ah pawh Silva hi a captain tlang a rinawm.