Serena leh Sharapova an chak

Hmeichhe tennis thununtu ni ṭhin Serena Williams leh Maria Sharapova ten Thawhlehni zan khan French Open first round an khel a, harsa takin hnehna an chang. World number 1 hlui Angelique Kerber pawhin Mona Barthel chu 6-2, 6-3 in a hneh ve bawk.

Roland Garros, Paris-a nomawi chawi tawh pahnih Garbine Muguruza leh Svetlana Kuznetsova te an intawng nghal bawk a, Spain nula Muguruza hian 7-6 (7-0), 6-2 a hnehna changin second round a lut ve bawk. Set hmasa zawka 5-5 a nih laiin ruah a sur a, darkar khat leh a chanve an chawlh hnuah khel zui lehin Muguruza-i'n game hnih chauh hloin set a la zui.

Serena a chak
Australian Open 2016-a Serena Williams-i'n nau pai chungin nomawi a chawi a, a hnu lamah Grand Slam a la khel leh lo. Nikum September thlaa fa a neih hnuah American nula hi French Open-ah rawn kirin Kristyna Pliskova chu 7-6 (7-4), 6-4 in a hneh. French Open vawi thum champion tawh Serena hian a match lehpekah chuan Ashleigh Barty a hmachhawn dawn.

Grand Slam vawi 23 champion tawh Serena hian thuamhnaw dum vek a inbel a, an inkhelh laia Paris khawlum lam hi 25C ni mah se a tih buai phah lo. Kum 36 mi Serena chuan, "Thil tithei chungchuang bik nih ka duh ṭhin a, tun ṭumah pawh hian lalnu thil ti thei tak, indo tura a che chhuak ang mai niin ka inhria," tiin a sawi.

Maria a la ngai
Tun hnai kum thum chhunga a vawi khat nan Sharapova-i'n French Open a khel, 2016 khan damdawi hman phal loh a hman vanga hrem a nih vangin a khel thei lo a, season hmasa khan wildcard pek a nih loh avangin a inlan lo bawk.

Russian nula hian minute 24 chhung set khatna chu harsa lutuk loin a la mai, set hnihnaah pawh 3-0 a hma a hruai hman avangin nuamsa taka tlang tur angin a lang hman. Mahse, world number 1 hlui hian a zawnin a service game vawi li a hloh a, deciding set a ngaih phah. Set thumnaah dinhmun hniam zawka a din hnuin game ruk a la zawn thung a, darkar khat leh minute 54 an inkhelh hnuah 6-1, 4-6, 6-3 in hnehna a chang.

Grand Slam vawi nga champion tawh Sharapova chuan, "Inelna lianah chuan duhthusama thil a kal tluan vek loh chang a awm thei, harsa taka hnehna chan hi a hlut zawk chang a awm a ni," a ti. Zanin hian world number 50 Donna Vekic nen second round-ah an intawng ang.