Hero Intercontinental Cup ; Asian Cup khel turin India inbuatsaih
June 1 aṭang hian Hero Intercontinental Cup chu Mumbai khawpuiah khelh ṭan a ni dawn a, he inelna hi All India Football Federation (AIFF)-in Asian Cup 2019 khel tur India inbuatsaih nana a ruahman a ni.
Hero Intercontinental Cup hi AIFF chuan kumtin neih an tum tawh tur thu an sawi a, tun ṭumah hian Chinese Taipei, New Zealand leh Kenya te nen India chu an inkhel kual ang a, a sang pahnihin champion nih inchuhin June 10-ah final an khel ang.
India squad-ah Mizo pali Jeje Lalpekhlua, Jerry Lalrinzuala, Lalruatthara leh Laldanmawia te an awm a, Hnahthial tlangval Jeje chu India tan regular starting XI ni tura beisei a ni.
Inlan tur chu
Mumbai-a inelna neih turah hian South Africa chu inhnukdawk mah se an hmun ruakah Kenya sawm an ni a, FIFA ranking-ah 111-na ni mekin Africa Cup of Nations-ah vawi nga an inlan tawh a, World Cup erawh an la khel lo thung.
New Zealand football hi team ṭha bera ngaih an ni a, OFC Nations Cup-ah vawi hnih champion tawhin World Cup-ah vawi hnih an inlan tawh bawk. FIFA ranking-ah 133-na ni mekin Swiss coach Fritz Schmid enkawlna hnuaia khel an ni.
Chinese Taipei chu tun inelnaa inlan tur zinga team 'tenau' bera ngaih an ni a, Asian Cup-ah pawh vawi hnih bak an la inlan lo. Chinese League One club Shanghai Shenxin coach hlui Gary White enkawlna hnuaiah khelin FIFA ranking-ah 121-na an ni.
AIFF leh dawt!
Indian FA-in Intercontinental Cup khelh a nih tur thu an puan rualin inelnaa tel tur team ten an squad neih ṭhat ber an tirh tur thu an sawi a, Vanglaini chuan April 23 chhuakah AIFF thusawi rin ngam a harsat thu kan lo ziak tawh.
Rin lawk ang ngeiin AIFF thusawi dik tawk lohna hma takah a lang chhuak a, South Africa an inhnukdawk a, Kenya sawm an ni. Mahse, Kenya-ah season a la tawp lo a, an player ṭha rual an rawn hruai dawn lo.
Indian football fan-ten Tottenham Hotspur midfielder Victor Wanyama hmuh chak mah se Kenya captain hi India-ah hruai a ni lo bawk.
Beisei loh lam
New Zealand pawhin India rama inelna tur hi 'hmasawnna' tur ai mahin 'inzirna' tur ang zawngin an thlir zawk a, an squad-ah ram tana la inlan lo player paruk ngawt an ko!
All Whites squad-ah hian ram tana vawi 15 inlan tawh Tim Payne chu tawnhriat ngah ber a ni a, player langsar zinga mipui hmuh chak zual zingah Burnley striker Chris Wood leh West Ham defender Winston Reid te pawh rawn hruai tel an ni lo.
New Zealand tana vawi 52 inlan tawh Michael McGlinchey, SC Heerenveen winger Marco Rojas, MLS club Minnesota United defender Michael Boxall leh Dutch club PEC Zwolle midfielder Ryan Thomas te pawh India-ah an inkhel dawn lo.