Beiseina nen Russia kan pan dawn - Messi

Lionel Messi chuan Haiti laka hattrick a siam hnuah Argentina chuan beiseina nen World Cup khel turin Russia an pan tur thu a sawi. Jorge Sampaoli naute hian nimin zing khan friendly match-ah Haiti 4-0 in an sawp.

Argentina rama khelmual pakhat La Bombonera-a inkhelah Messi-a'n goal thum a khung bakah Sergio Aguero goal khung tur a siamsak bawk. Hun tawp lam minute 20 chhungin South Amrica ram hian goal khung belh tawh lo mah se inkhel an thunun tluan a, 1974 World Cup-a inlan ve tawh Haiti-in anmahni aia FIFA ranking lama 103 ngawta sang lakah buaina an siam phak lo.

Barcelona thiampuipa Messi chuan, "Qualifier-ah khan duhthusamin kan khel lo a, tunah erawh training kan neih ṭhat tawh avangin thil a danglam chho tawh. Rinkai ni chungin Russia kan pan lo a ni mai thei, mahse beiseina nen kan theihna zawng zawng kan hlan dawn a ni," tiin a sawi.

Ram tan match 124 a khelh aṭanga goal 64 khungtu Messi chuan sawi zawmin, "Hmasawnna tur lai kan nei a, tunah hian inbuatsaih nan hun ka la ngah tawk. World Cup nomawi chawi hi keini leh Argentina mipui duhthusam a ni a, tih hlawhtlin ngei kan tum ang," a ti.

Argentina inrem dan
World champion vawi hnih ni tawh Argentina hian tlarhma a khel tur player an nei ṭha, coach Sampaoli-a'n eng tiangin nge a rem dawn tih chu khawvel hriat chak a ni. Haiti lakah Gonzalo Higuain leh Messi te tlarhmaah an awm a, a sirah Angel Di Maria leh Manuel Lanzini te an awm thung.

Khup hliam vanga Premier League season tawp lam khel lo Aguero a dam tawh a, Juventus striker Higuain nen hmun an inchuh ang. Barcelona midfielder hlui Javier Mascherano chu defender atan hman ṭhin ni mah se midfield lailum luahtu atan hman a ni.

Kum 33 mi Mascherano hian ram tan match 143 a khel tling ta a, Inter Milan captain hlui Javier Zanetti record nih rualin Argentina tana inlan hnem ber anni chiah. Mascherano tan World Cup hnuhnung ber a ni tawh dawn a, hliam vanga a inlan lo a nih ngawt loh chuan Zanetti a khum dawn. Mamawh huna tlarhnunga khel thei a nihna leh a tawnhriatte hi team tan a ṭangkai thei ang.

Manchester United goalkeeper Sergio Romero-a'n hliam vanga World Cup a khelh dawn loh avangin Chelsea keeper Willy Caballero-a'n goal a veng. Jose Mourinho hnuaia khel tam lo defender Marcos Rojo pawh bench-ah ṭhuttir niin, hun tawp dawn lamah luhtir a ni. Pep Guardiola duhlai Nicolas Otamendi erawh tlarhnung laia an rinrawl a ni thung.

Group D
Argentina hian World Cup inbuatsaihna nei turin Barcelona an pan a, Russia-ah chuan Iceland, Croatia leh Nigeria te nen Group D-ah an awmkhawm dawn, an match hmasa ber atan June 16 hian Iceland nen an inkhel ang.

Jorge Sampaoli naute hian qualifier-ah goal khung an thei tawk lo a, South America ram 10 inel zingah Bolivia chiah anmahni aia goal khung tlem an ni. World Cup group stage-a an hmachhawn tur ho thlir chuan awlsam takin an tlang kher lo mai thei. Haiti an hmachhawn hma hian Nigeria (4-2) leh Spain (6-1) te an ngam lo. Mahse, heng inkhel pahnihah hian an thiampuipa Messi a tel lo thung.

Croatia leh Iceland te hi qualifier lamah an inel tawh hle a, head-to-head hmangin Iceland an chungnung zawk. Luka Modric leh Ivan Rakitic te awmna ram Croatia hian playoff-ah Greece an hneh zui leh a, Juventus striker Mario Mandzukic an neih tel bawk avangin zuam sual theih tak tur an ni.

Africa Cup of Nations lamah beisei phak lo mah se Nigeria hi dah hniam ngawt theih an ni bik lo. Premier League trio Alex Iwobi, Kelechi Iheanacho leh Wilfred Ndidi ten coach tawnhriat ngah Gernot Rohr kaihhruaina hnuaiah an khel, match khat khelh hmabak nei chungin Russia ticket an nei fel hman.

World Cup khel tura ram te ber Iceland hi Croatia, Ukraine leh Turkey te awmna group aṭanga inpet tling thei an ni a, Euro 2016-a thil mak thlentir tawhtu ram hian World Cup-ah pawh inrintawkna sang tak nen pressure nei miah loin an khel thei dawn a ni.