AIFF leh KNVB thawkho dawn

All India Football Federation chuan Dutch football-a thuneitu sang ber Royal Dutch Football Association (KNVB) nen thawhhona thuthlung an ziak.

Ram pahnih FA thawhhonaah hian AIFF aiawhin general secretary Kushal Das chuan a hming a ziak a, KNVB aiawhin secretary general Gijs de Jong chuan a hming a ziak ve bawk.

Pawl pahnih hi youth development programme, women’s football leh coach education-ah te an thawk ho dawn a, AIFF secretary Kushal Das chuan Dutch football nena thawhhona an nei thei tur chu a lawm thu a sawi.

Kushal Das chuan, "Kum 2011 khan Robert Baan chuan technical director ni turin AIFF a zawm a, khata ṭang khan Dutch football nena kan thawhhona hi a ṭha chho ta zel a ni. Baan khan hma kan sawn zelna turin kalphung 'Lakshya' tih a duang bawk a, hei hi kan la chhunzawm reng a ni," a ti.

KNVB aiawh Gijs de Jong chuan, "Indian FA nen thawhhona kan nei tur hi kan lawm takzet a, khawvel huap angin tawnhriat tam tak kan nei tawh a, talent tam tak awmna India nena kan thawkdun leh thei ta hi kan hlim takzet a ni," tiin a sawi ve bawk.