World Cup 2026 thlen beisei Morocco

Morocco chuan World Cup 2026 thlen an beiseina kawngah Europe ram te hmin an tum a, Morocco World Cup bid chief executive Hicham El Amrani chuan, "Europe-a khelh ang mai a ni dawn a ni," a ti!

Kum 2026 World Cup-ah hian team 48 an tel tawh dawn a, Morocco bakah hian Canada, Mexico leh United States chuan inthlen ṭawm turin dilna an thehlut ve bawk.

Hicham El Amrani chuan, "Moroccan World Cup hi African World Cup chauh a ni dawn lo a, European World Cup ang mai a ni zawk dawn a ni.

"Kan ram aṭang hian Spain chhim lam chu kilometre 14 chauh a ni a, Europe-a khawpui tam tak tan Morocco hi thlawhtheihna hmanga awlsam taka thlen phak vek a ni bawk. Hei vang hian European fans tam tak an lokal thei dawn a ni," a ti a, a campaign thiam hle.

Africa khawmualpui ram zingah South Africa chu World Cup thleng awmchhun an la ni a, 2010 khan an thleng. 2026 World Cup thleng tur hi June 13-ah tih chian a ni dawn a, FIFA hnuaia ram 200 aiawhten vote hmangin an chingfel dawn a ni.

Kum 2026 World Cup hi Canada, Mexico leh United States ṭangho pawhin thlen an tum ngawrh hle a, US President Donald Trump phei chuan, "Sum leh paia kan puih fo ṭhinten kan mamawh ve huna min pui let lo a nih chuan a lawmawm loh khawp ang.

"Puih kan ngaih huna min pui duh lotu ram chu United Nations thleng pawhin engvangin nge kan puih bik ang?" tiin twitter lamah a lo ziak tawh!