Yuki a tla nghal

India tennis player zinga French Open main draw khel phak awmchhun Yuki Bhambri chu first round paltlang zo loin a tla. Thawhlehni zan khan a match hmasa ber khelin Ruben Bemelmans lakah 4-6, 4-6, 1-6 in a tlawm.

Yuki-a'n inkhel bul a ṭan fuh viau a, a khingpui service hmasa ber a chhuhsak thei. Mahse, 4-1 ngawt a hma a hruai hnuah a khel ṭha zui lo a, game lak belh miah loin set a hloh. Set hnihnaah pawh 4-2 in hma a hruai leh hman. Amaherawhchu inelna liana tawnhriat a neih tlem a lang a, huaisenna a neih tam loh bakah a vannei lo ve bawk.

India number 1 hian winners vawi 32 vaw chhuak thei mah se unforced errors vawi 45 a nei thung a, darkar hnih leh minute nga an inkhelh chhungin US Open leh Wimbledon lama tawnhriat nei tawh Bemelmans a vannei zawk.

Kum 25 mi Yuki chuan, "4-2 a nih tawh chinah chuan set la thei tur ka ni, mahse ka hlawhtling thei miau si lo," tiin a vanneih loh thu a sawi. Yuki hian Grand Slam leh ATP Masters 1000 lamah singles bakah doubles khelh zui a tum thu a sawi a, French Open-ah pawh hian France tlangval Fabrice Martin nena ṭang dunin double huangah an inlan dawn a ni.