Everton leh Marco Silva inhnaih

Sam Allardyce ban a nih hnuah Everton-in English manager thlakna tur an nei hnai a, tun kar chhung hian Watford boss hlui Marco Silva chu inremna an neihpui hman beisei a ni.

Kum 40 mi manager hi Everton neitu Farhad Moshiri-a'n a club enkawl tura a duh ber a ni a, Ronaldo Koeman an ban hnuah November khan an coach ni turin an lo sawm tawh.

Mahse, hetih hunlaia a enkawl Watford thuneituten Silva hi a chhuah an phal lo a, Everton chu an boss an dawrnaah inhnukkir turin an ti hial a, Premier League-ah an hek bawk.

Beisei ang erawhin thil a kaltluang lo. Watford hian Everton nen boruak an neih hnuah result ṭha an neih theih loh avangin January khan Silva hi a hna aṭangin an ban ta tho a, Everton chet dan chuan an coach rilru a hruai peng niah an ngai.

Season thar atana insingsa mek Everton hian Zirtawpni khan director of football atan Marcel Brands an lalut bawk a, PSV Eindhoven-a director of football hlui hian manager tihchian hi a duh hmasak ber niin an sawi.

Brands chuan coach thar tur chu, "Hma hun thlir thiam tak coach kan mamawh a, tunlai football hrethiam tak mi a nih a ngai a, player naupang zawk chher hriam thiam mi kan mamawh," tiin an coach thar zawn chungchang a lo sawi tawh.

Portuguese manager Silva hian Portuguese club ṭha Sporting Lisbon chu a enkawl laiin Portuguese Cup-ah a lo champion pui tawh a, Olympiakos chu Greece Super League-ah nomawi a lo chawipui tawh bawk.