Tyson Fury vaupung a na

World heavyweight champion hlui Tyson Fury chuan boxing khawvela hming langsar ni mek Anthony Joshua leh Deontay Wilder aia a ṭhat zawk zia pholang turin a hmaa ding apiang tukdawl zel a tum thu a sawi.

Kum 29 mi boxer hian November 2015 khan Wladimir Klitschko chu hnehin khawvel a barakhaih a, mahse IBF, WBA leh WBO title laa Ukrainian boxer a tukdawl hnuah erawh buaina hrang hrang avangin ring chhung a rap leh tawh lo.

Fury hi kuminah boxing-a kir leh turin a inbuatsaih mek a, June 9 khian Albanian boxer Sefer Seferi nen an inhnek dawn. British boxer chuan, "Miin kei aia AJ leh Deontay Wilder ṭha zawk anga an ngai tur ka ngaihtuah hian ka muhil thei lo ṭhin," a ti!

Kum 28 mi Joshua hi WBA, IBF leh WBO champion lai a ni a, kum 32 mi American Wilder hi WBC champion lai a ni thung.

Fury chuan, "An chhia leh ṭha hriatna hloh ṭhak khawpa tukdawl ka chak a ni. AJ hi ka kut veilam hmanga a na thei ang bera hnek ka chak a, tun hma zawng ai khan ka tuihal a ni," tiin a ṭawng pawr hle.

June 9-a Fury nena inhnek tur Seferi hian a hun tam zawk chu cruiserweight-ah hmangin vawi 24 inhnek a hmachhawnah vawi khat chiah a la tlawm a ni.