Salah ropuinain Old Trafford mipui a hnawt haw

Engtiklai pawhin Manchester United leh Liverpool inkhel boruak a sang lo ngai lo a, football khawvelah anni pahnih inkhel aia nghahhlelhawm a awm chuang lo.

Mahse, Pathianni zana club pahnih inkhelah mualneitu United fan-te hun tawp hmain an haw dul dul a, Liverpool fan-te lahin, "Ole hi ban suh u," tiin zai hla an rem a, an hmelma club enkawltu Ole Gunnar Solskjaer chu la cham zel turin an duh.

Heng zawng zawng thlentirtu chu Liverpool an ni a, a changtupa chu Mohamed Salah a ni. Pathianni zan khan Reds-in 5-0 in United an sawp a, Salah chuan hattrick a siam.

Liverpool tan Naby Keita leh Diogo Jota ten goal khat ve ve an khung bawk a, player 11 pawha an hneh loh tehlul nen United midfielder Paul Pogba chu minute 60-naah hnawhchhuah a ni bawk.

Practice match?
Old Trafford-ah mualneitu lamin chance hlauhawm an nei hmasa zawk a, Bruno Fernandes chuan hnai set sawt aṭangin holam takin a hlah - United fans an au dual a, hemi hnuah erawh an au leh tawh lo.

Minute ngana lekah United tlarhnung pawp zarah Salah chuan Keita tan a siamsak a, tun hnaia goal khung dan thiam thar midfielder hian David de Gea goal vena khung turin harsatna a nei lo.

United an insiamrem hman lo - minute riat a liam a, vengtu nei lo Jota chuan Trent Alexander-Arnold siamsak aṭanga a ball hmuh chu a tlawh goal a, player-te thlantui pawh a tlak hmain 2-0 a ni der!

Red Devils lamin Liverpool nawr let ngaihna an hre lo a, an game-in awmzia a nei lo. Reds player-ten duhthala ball an inpek kual theih nan hmun awl an siamsak a ni ber a, Jurgen Klopp-a naute tan chuan 'practice match' ang chauh a ni.

Salah, i zunzam a ni
United tan Liverpool pawh thlak tum chu cho loh leng chhai ang chauh a ni a, mi tam takin tun dinhmuna khawvela footballer ṭha bera an ngaih Salah lah a hlauhawm em em reng bawk - bench lamah Mane a la awm mah mah!

Minute 38-naah Liverpool goal hmahruai khungtu Keita chuan Salah a duhsak let a, a siamsak. Egyptian forward-in goal-ah a chantir a, inelna hrang hranga match 10 chhung a zawna goal a khungna a ni ta.

United an tho thei lo a, zun ram thiar kar lekah a lo goal leh ṭhin! Hun pek belh minute nganaah Salah bawkin goal a khung leh a, si li ngawt phur chungin United-in dressing room an pan.

Second half-ah pawh Salah hming bawk lam nawn a ngai - Egyptian forward hian minute 50-naah Jordan Henderson-a ball pek ṭha bik hmanga a goal thumna khungin hattrick a siam a, Liverpool a chakpui chiang hle.

In sang lua
Chelsea, Liverpool leh Manchester City khelh dan en ila, United tan champion sawi rik ve chi a la ni lo tih a chiang a, Ole-a'n Red Devils a zawm hnuah pound maktaduai 400 chuang a hman tawh avangin anni huanga awm tur erawh an ni lawi si.

Solskjaer-a'n 4-2-3-1 formation hmangin a tlarhma neih ṭhat a rawn thawhchhuahpui a, Liverpool goal nawr na tur veng turin holding midfielder pahnih Scott McTominay leh Fred a dah lut a, mahse, player pahnihin an hna an tlin lohzia pholangtu chu goal nga a ni.

Tlarhmaah Cristiano Ronaldo chu sawm loh mikhual ang maiin a inthlahrung a, Mason Greenwood, Bruno leh Marcus Rashford ten beisei an phak lo a, a tikimtu satliah mai an ni.

United tlarhnung en ila, captain Harry Maguire hoin Luke Shaw, Victor Lindelöf leh Aaron Wan-Bissaka te chu inkhelh thiam vanga hlawh neia rin an harsa zawk hial a, Jota goal khung dawna Maguire leh Shaw 'insu' te chu a 'world class' lo takzet.

I goal khung thiam vang hian maw Salah!
Old Trafford-a United khingpui zinga Premier League-a hattrick siam thei awmchhun chu Mohamed Salah a ni a, Egyptian forward hian a chetna apiangah record thar a siam zel.

April 2003 khan Ronaldo chuan Real Madrid tan Old Trafford-ah hattrick a lo siam tawh a, Brazilian striker hnua Old Trafford-a mikhual team tana hattrick siam hmasa ber a ni bawk - hei erawh Champions League a ni. Salah hian Premier League-ah goal 107 zet a khung tling ta a, African player zinga English top flight football-a goal khung hnem ber ni tur hian Chelsea legend Didier Drogba (104 goals) a khum chiang hle.
Kum 29 mi forward hian tun season inelna hrang hrangah match 12 khelin goal 15 a khung tling tawh a, assist vawi nga a nei bawk.

Salah chuan, "Ka team-in hnehna an chan chhung chuan ka lawm a, ka team tan theihtawp ka chhuah zel ang. Kan goal hmasa ber pawh Keita ka siamsak a ni," a ti a, mimal record aia result a ngaih pawimawh thu a sawi. Anfield-a a career hman zawh a duh thu sawitu forward chuan, "Kum hnih liam taah khan Premier League champion kan lo ni tawh a, nomawi chawi tura tih ngai chu kan hria. Old Trafford-ah kan chak a, mahse, kan hlawhchhuah chu point thum tho a ni.

"Game tina chaka champion hi kan duh chu a ni mai a, pre-season aṭang khan he thinlung hi kan pu tawh - kan champion ngei pawh ka beisei," a ti a, league nomawi pakhatah lungawi a tum lo.

Ronaldo ball thah hnem zan
Old Trafford-ah Liverpool-in goal an khung mawlh mawlh a, Cristiano Ronaldo-a'n ball a thah mawlh mawlh thung - a ball thah lai lo chuan hmuh tur a awm meuh lo!

Premier League match li zet chu Ronaldo hian goal a khung lo ta a, Old Trafford-ah Manchester United fan-ten "Siuuuuuuu" tih châk viau mah se lu thak lo pui hiata inkhel en bak tih theih an nei meuh lo - Liverpool ber kher laka mualpho hi a na ang.

Kum 36 mi Ronaldo hian goal chu a khung ngei a, mahse, video assistant referee rawn a nih hnuah offside vangin pawm a ni lo a, Curtis Jones a pet luih avanga red card pek a ni lo chu a vannei hle bawk. Ole Gunnar Solskjaer-a'n nipui transfer-a an mamawh ber defensive midfielder lalut loa Ronaldo chhehvel buaipui pawizia a hre chho ṭanin a rinawm.

Ronaldo chuan, "A chang chuan kan beisei result kan hmu lo fo a, kan duh ang goal kan khung lo fo. Tumah dem tur dang an awm lo a, kan thiam loh liau liau a ni," tiin an chak loh chhanah dem tur dang a zawng lo.
Tun season inelna hrang hranga match kua aṭanga goal ruk khung tawh Ronaldo chuan sawi zawmin, "Kan fan-te min thlawp tlatna kha lawmawm ka ti," a ti a, stadium an chhuahsan lai a hmu ve lo a ni mai thei!
Ronaldo chuan, "Fan-ten hei aia result ṭha zawk an phu a, chumi thlentir thei chu keimahni kan ni a, tunah kan insiamṭhat a ngai a ni," a ti zui a, insiamṭhat an mamawh tih hi inkhel entute chuan an ṭawmpui vek ang.

Ole a chhuak dawn em?
Liverpool lakah United an mualpho a, thilmak danglam a thleng a nih loh chuan Red Devils hian tun season-ah nomawi an chawi a rinawm loh.

Tuna zawhna lian ber ni ta chu United-in Ole Gunnar Solskjaer an chelh zel ang em, tih chu a ni a, Manchester khaw club hian an coach hi ban ngawt se, a thlak tur an awm ang em, tih chu zawhna lian tak a ni bawk.
Coach langsar zingah Antonio Conte chu hna nei loin a awm mek. Mahse, Chelsea boss hlui hian hlawh a phut hnem dawn a, transfer bazar-ah a duh ang zat sum hman tur hmuh a beisei bawk ang.

Chu chauh a ni lo - Conte hi mahni thu duh ve tak a ni a, hei hi United thuneitute nen an inmil lohna tur niin a lang. Mauricio Pochettino-a'n Paris St-Germain a enkawl mek bawk. A tawi zawnga sawi chuan coach ṭha leh langsar zingah 'awl' mek an awm lo a, United tan hmanhmawh taka Solskjaer ban ngawt hi a fuh lohna a awm ve thei.

Mahse, Ole hi Liverpool laka an mualphona meuh pawhin chhuahna kawngkhar a kawhhmuh lo a nih chuan United fans aiin an elpui fans an lawm zawk ang - United hian kartawpah Tottenham Hotspur an lenchilh zui dawn tih theihnghilh loh a ṭha.

Ni duhawm tak a ni a, zanin result hian club chanchin ziahnaah hmun tlem chu a luah ve ang chu. Hetiang ang result hi chu a thleng leh mai mai tawh dawn lo a, miten rei tak an sawi tur result a ni. Eng nge ka sawi leh chuan ang? Kha result em kha chu kan beisei bik lo a, a mak zawk a ni. Result danglam bik a ni a, mahse, kan khingpui kan zah avangin mimawl ang maia chak lawm erawh kan tum lo. Ṭhenkhatah kha chuan kan vannei ve bawk a, an ṭhat dan angin United an khel lo ve bawk a ni. - Jurgen Klopp, Liverpool manager

A pawi ka ti a, a hrehawm ka ti a, ka thinrim em em bawk. Engtinnge hma kan sawn ang a, hetiang thil hi a thlen tawh loh ang, tih ka ngaihtuahna piahlamah chuan ka rilru puthmangin ṭangkaina a nei lo. Duhthlan tur kan nei - lungngai taka indawm kun emaw min tichaktuah emaw he result hi kan hmang thei.Liverpool kha goal hmaah an hriam em em a, goal hmaah result chu chinfel a ni miau bawk si. Goal thumna kan chhuah kha chuan engkim a chiang tawh ang hial a ni. Chance pawh kan siam ve ngei a, mahse, hmun awl kan pe hnem ṭhin em a ni. Game hautak tak takin min hmuak a, indawmkun hun a ni lo a, thawh ho hun a ni.
Beidawnga tlawm mai tur chuan ka naute hian kawng an zawh thui tawk tawh a, kum rei tak chhung an hmasawnna ka hmu tawh a, an thawk ho ṭhain an inthlawp ṭha em em. Mahse, vawiinah erawh an ṭha tawk lo a ni. - Ole Gunnar Solskjaer, Manchester United manager