MotoGP champion Fabio Quartararo

Fabio Quartararo chu 2021 MotoGP champion a ni chiang ta. Bike intlansiakna sang berah Quartararo hian season thum a hmanna a ni a, tunah chuan sulhnu duhawm hnutchhiahin French tlangval zinga champion thei hmasa ber dinhmun a luah.

Pathianni zan khan Misano World Circuit-ah Emilia Romagna Grand Prix tlan niin, kum 22 mi Quartararo hi palinaah a thleng. Championship lama a elpui Francesco Bagnaia a tlan tluan ve thei lo a, inelna hmabak pahnih la awm mah se midang tlan umphak theih a ni tawh lo.

Yamaha rider hian point 267 a khawl khawm tawh, pahnihna dinhmun luahtu Bagnaia-a'n point 202 a nei thung. Intlansiak pakhatah hian a sang berah point 25 bak a hmuh theih loh a, hmabak pahnih la awmah Quartararo-a'n point hmuh belh lo pawh ni se a sang ber dawn tho a ni.

Mi thar chu
MotoGP hi tun hnaiah Spanish tlangvalten an thunun hneh viau. Marc Marquez, Jorge Lorenzo leh Joan Mir ten tun hnai season kua zet chu Spain ramah nomawi an hawn a, an ta neih a ni hman ber mai.

Kuminah erawh hmel thar kan hmu, season tir aṭanga tlan ṭha leh ngelnghet ber Quartararo-a'n nomawi chawi a phu a, chutih rualin rider dangte chet fuh tawk loh ṭum a tawn avangin beisei aia hmain a champion ti pawhin a sawi theih ang.

Kum 22 mi Quartararo chuan, "Ka mumang ramah ka cheng, hlawhtlinna ka channa hmunah ka chhungten min ṭawiawm thei hian lawm a tifamkim. A nihna takah chuan he hlawhtlinna hi a tak a ni tih hi rin a la harsa," tiin a rin phak loh thil a nih thu a sawi.

An lawmpui
Season hmasaa intlansiak theih loh hnuah Marquez a lo kir leh a, kuminah pawh bul a ṭan thei lo. Season chawhnu lamah erawh Honda rider hian a theihna sang tak a lantir leh tawh a, bike inelna sangah hian a hun a la liam bik lo tih a lang.

Emilia Romagna Grand Prix-a hnehna changtu Marquez chuan, "Tun ṭumah hian hnehna ka chang ngei mai, mahse kan boruak hi Fabio tan a ni, a phu leh champion awm ber a ni a, hlawhtlinna a chang thei hi ka lawmpui takzet," tiin a sawi.

November thla hian Algarev GP leh Valencian GP an tlan leh dawn. Kuminah hian a tira ruahman sa, mahse hri leng vanga tlan theih loh paruk ngawt a awm a, intlansiak 24 awm tura tih ni mah se vawi 18 chauh an tlan thei dawn a ni.