Pakistan lakah India an zawr

Inrinni zan khan T20 World Cup-ah champion rinkai zinga mi India an inlan a, an hmelma Pakistan lakah wicket 10-in an tlawm. Dubai-ah Virat Kohli hote an mualpho a, an bul ṭan dan a fuh loh avangin semifinal thlen a harsat phah ang.

Men in Blue-in bul an ṭan ṭha lo chungin over 20-ah 151/7 an siam thei a, vanneih ṭum ni se chakpui tham a ni pha tho. Amaherawhchu Pakistan opener pahnih Mohammed Rizwan (79) leh captain Babar Azman (68) te an ropui a, over 17.5-ah 152 runs siamin hnehna an chang.

A hunah Kohli
Ṭhumvawrah Pakistan an vannei a, vawm hmasak an thlang. Shaheen Afridi-a'n India opener pahnih Rohit Sharma (0) leh KL Rahul (3) te chu pavillion lamah a thawnlet leh nghal.

Hun harsa aṭanga India chhanchhuak turin Kohli a rawn pen chhuak a, 57 runs a rawn siam. Captain thlawp ṭha ber Rishabh Pant-a'n 39 runs a rawn siam belh a, amaherawhchu all rounder Ravindra Jadeja (13) leh Hardik Pandya (11) te mamawh chhanna an ni pha lo.

Over 20-ah India-in 151 runs an siam a, wicket sarih an hloh bawk avangin Pakistan bowler-te an che ṭha zawk. Player of the match-a thlan Shaheen Afridi-a'n wicket thum lain 31 runs a pe a, Indian opener pahnih bakah captain Kohli te a vawm hlum avangin a hnathawh hi a langsar hle.

Rizwan leh Babar
Pakistan hian batsman an nei ṭha hrim hrim a, captain Babar Azman hi T20 ranking-ah pahnihna ni lai a ni a, a kawppui Mohammad Rizwan hi pasarihnaah a awm mek bawk.

Rizwan hian ball 55-ah 79 runs a siam a, Babar-a'n ball 52-ah 68 runs siam bawkin a tawp thlengin an dam a, over 17.5-ah 152 runs siamin hnehna an chang. Indian bowler Jasprit Bumrah (22/0), Mohammed Shami (43/0), Bhuvneshwar Kumar (25/0), Varun Chakravarthy (33/0) leh Ravindra Jadeja (28/0) ten wicket khat pawh an la thei lo.

An nghak chhuak ta
Pakistan-in mumang ramah pawh an la beisei phak loh tura ṭhain an khel chhuak a, kum 29 chhung hrehawm an tawrhna chu thawi damin a awm.

Tun hmain Pakistan-in World Cup inelna hrim hrimah India hi an la hneh ngai lo. Ram inhal tak pahnih inhmachhawn hmasak ber chu kum 1992 kha a ni a, India-in hnehna an chang.

Hemi kum aṭanga chhiar ṭan hian Pakistan hi a rilru na zawkah an ṭang chho ngar ngar a, tunah chuan an nui ve thei ta. Test Match Special commentator leh Pakistan ṭantu Aatif Nawaz chuan, "Tun aia hlim hi ka la nei ngai lo. Kan hnehna chan hian ram pumah hlimna a thlen ang. Tumahin hetiang anga kan chak hi an ring lo a, kan chak dan hi a ropui thlawt a ni," tiin a sawi.

Engtin zel?
India captain Virat Kohli chuan, "Pakistan an khel ṭha zawk a, kan hneh lo tih ka pawm. Kan beisei angin bul kan ṭan lo a, bat hnuhnung zawk dinhmun a ṭhat avangin run 20 tal chu siam belh ila a ziaawm ang. Mahse, wicket kan hloh hma avangin engkim kha a harsat phah a ni," tiin a sawi.

Pakistan captain Babar Azman chuan, "Kan bowler-te an che ṭha a, a bik takin Shaheen Afridi a che ṭha. Batting-ah chuan Rizwan khan engkim a ti awlsam a, dai a tlak hnuah kha hna a awlsam sawt bawk," tiin a sawi.

India hian October 21, Pathianni zan dar 7:30-ah New Zealand an hmachhawn dawn a, Kane Williamson-a hote hi an hneh lo a nih ngat chuan semifinal thleng turin result danga innghah a ṭul tawh ang.

Thlirna Tawi
World Cup bikah Pakistan-in a zawnin match 12 chhung India an hneh lo a, match 13-naah Shaheens an chak.
T20-ah Pakistan 10 wicket-a an chakna hmasa ber a ni a, India erawh 10 wicket-a an chak lohna hmasa ber a ni thung.
Player of the match Shaheen Afridi-a'n (31/3) Rohit Sharma leh KL Rahul te a vawm hlum nghal a, India-in run ruk lek an siam tihin wicket hnih an chan.
Virat Kohli-a'n ball 49-ah 57 runs a siam a, T20 World Cup-ah half century vawi 10 siamin record a ni.