El Clasico: Real laka tlawm Barca tan ni a chhuak thei lo!
Barcelona-in El Clasico-ah Real Madrid hneh ngat se chuan top four-a awm Atletico Madrid nen an point hmuh zat a inang ang a, pasarihnaah Real Madrid an chhuk thla thung ang.
Mahse, beiseina thamral mai an chang. Barcelona-in an mikhual Real Madrid an ngam lo a, El Clasico-ah 2-1 in an tlawm a, table-ah pakuana dinhmun an luah mek.
Real tan David Alaba leh Lucas Vazquez ten goal khat ve ve an khung a, Sergio Aguero-a'n Barca tana a goal hmasa ber khung mah se a team a chhanhim zo lo.
La Liga inkhel ngaihven hlawh dangah Atlético Madrid leh Real Sociedad chu 2-2 in an inhnehtawk a, mikhual team Sociedad-in table chung ber an luah chhunzawm zel.
A hming Alaba
Nipui transfer-a Real Madrid a pan hnua a vawi khat nan Alaba chuan goal a khung a, El Clasico-ah ber kher a goal hmasa ber a khung hi Austrian defender tan chuan hriatreng tawh tur a ni.
Bayern Munich defender hlui hian anmani penalty box hmawrah Barca striker Memphis Depay ball chan lai chu a chhuhsak a, he counter-attack aṭanga ball kalah hian Rodrygo ball pek chu changin hmahruaina goal a khung.
Nou Camp-ah goal dang erawh kan hmu lawk lo. Hun pek belh minute linaah Barca keeper Marc-Andre ter Stegen chuan Marco Asensio-a shot a dang per a, a per lehlam hi Vazquez chuan awlsam takin a pet goal.
Minute thum hnuah Agüero chuan khung ve leh mah se goal hnih an chhuah avangin Catalan club tan si phurh sut zawhna hun a awm tawh lo a, Lionel Messi leh Sergio Ramos chhuah hnua El Clasico hmasa berah Real an chak.
Beidawnna Koeman
Nou Camp-ah fans 86,000 an pungkhawm a, an duh ang result erawh an hmu lo chiang hle. Barca player-ten Real tlarhnung tan hna an siam meuh lo a, Real keeper Thibaut Courtois chuan vawi khat bak save a nei lo!
Barca tan kum 17 mi Gavi a inlan a, kum 1941 hnua El Clasico-a bul ṭan thei naupang ber midfielder hian danglamna erawh a thlen lo.
Barca boss Ronald Koeman-a'n record duhawm lo a siam a, Patrick O'Connell hnua El Clasico-a a match hmasa pathuma Barca coach tlawm vek hmasa ber a ni - Irish coach O'Connell hi 1935-1940 inkar khan vawi li a tlawm.
Koeman chuan, "Mahni khel-mualah, kan elpui ber team lakah, inhnehtawk tak chunga kan tlawm hi hriatthiam a har hle," a ti a, Barca fans-in an hrethiam lo lehzual ang!
Atletico chhantu Suarez
La Liga hmahruaitu Real Sociedad-in table chung berah cham zel an tum tih pholangin Atletico lakah inkhel hmuhnawm an pho chhuak a, minute 50 hmain goal hnih an khung hman.
Real Sociedad tan hian Alexander Sorloth chuan minute sarihna lekah Alexander Isak-a siamsak chu goal-ah a chantir a, Isak hian minute 48-naah a chhunzawm ve leh bawk.
Atlético hi mahni mualah an tlawm mai dawn niin a lang hman a, mahse, an beidawng duh lo. Mamawh hunah Luis Suarez a inlar a, Barcelona striker hlui hian minute 61-naah Joao Felix-a siamsak chu tauh lutin si phurh a sut ṭhen.
Minute 77-naah Mikel Merino-a'n a tih tluk hnuin Suarez-a'n penalty a hlawh chhuak a, a penalty hlawhchhuah hi goal-ah chantirin si phurh a sut zo - goal dang erawh a khung thei tawh bik lo a, 2-2 in an inhnehtawk.