Serie A-ah manager pali hnawt chhuak

AS Roma coach Jose Mourinho, Napoli coach Luciano Spalletti, Atalanta coach Gian Piero Gasperini leh Inter Milan coach Simone Inzaghi te chuan kar tawp Serie A inkhel hrang hrangah red card an hmu vek a, hei hian Serie A boruak nunzia a ti lang chiang.

Pathianni zan inkhelah champion lai Inter Milan leh Juventus te 1-1 in an inhnehtawk a, hun tawp dawna Paulo Dybala penalty khung hmangin Old Lady lamin point khat an hlawh chhuak hram.

Inhnehtawk
San Siro-a inkhelah Inter Milan an che fuh hmasa, striker tawnhriat nei ṭha Edin Dzeko chuan goal hmahruai a khung. Midfielder Hakan Calhanoglu-a shot per let chu Bosnia international Dzeko hian a khung.

Luciano Spalletti-a'n tlarhnung a remphui ṭha a, mikhual team lamin na takin nawr let ṭhin mah se an che sual duh lo. Mahse, hun tawp dawnah Denzel Dumfries chuan Alex Sandro lakah penalty a chawi, a pettu Dybala tan harsatna a awm lo.

Argentina international Dybala hian Serie A-ah penalty vawi 20 a pet zinga 18 a khung. Juve tan penalty hi lawmna a nih laiin Inter manager Inzaghi a lungawi thei lo, uchuak taka a dodal avangin an hnawt chhuak.

Inter coach Inzaghi chuan, "A nihna takah chuan point hnih kan hloh, chak phu leh khel ṭha zawk ni mah ila vanduai ṭum hi a awm. Tunah chuan match hmabak kan ngaihtuah a ngai," a ti. Nilaini zanah Empoli an hmachhawn leh nghal ang.

Jose an hrem
Mourinho a nih tawh chuan thawnthu ngaihnawm in a zui ṭhin. AS Roma manager hian Napoli chak tluang lai chu a lo tih tawpsak a, team pahnih hi goal awm loin an inhnehtawk - Luciano Spalletti nauten tun season league match bika a vawi khat nan point an hloh.

Hun tawp hma minute kua chauh awm tawhah Mourinho chuan referee Davide Massa thutlukna tih el nan a kut zingpui a lo hmuh a, an hnawt chhuak zui nghal, an khingpui Napoli manager Spalletti pawh a bang thei bik lo, fans nena buaina neih vanga hrem a ni thung.

Roma hian point 16 hmuin Serie A table-ah palina an ni a, season bul ṭan fuh tak Napoli chuan point 25 hmuin hma an la hruai thung. Mahse, khelh zat inangah AC Milan nen an point neih zat a intluk tawh, chet sual zeuh chuan hmahruaitu an inthlak thei dawn.

Inkhel dangah Manchester United laka chak lo hlim Atalanta chu an mikhual Udinese nen 1-1 in an inhnehtawk a, he inkhelah hian Atalanta manager Gian Piero Gasperini chuan red card a hmu a, inkhelh bakah referee tihsual an tawrh nasat thu a sawi zui.