PSG leh Marseille inhnehtawk

Marseille fans lamin Paris St-Germain an mikhual ṭumin buaina an siam leh a, an thawm a rawva bakah khelmual chhungah thil hrang hrang an vawm lut - Paris club nen hian goal awm loin an inhnehtawk.

Lionel Messi, Neymar leh Kylian Mbappe te inkawp mah se PSG tan goal khung ngawt theih a ni bik lo, minute 57-naah defender pawimawh Achraf Hakimi chu Cengiz Under laka a foul avangin hnawh chhuah a ni, point khatah an lungawi a ngai.

Season kal laiah Marseille fan-te hian buaina an siam fo tawh a, match ṭhenkhat phei chu khelh zawh theih loh pawh an nei, Neymar-a'n corner a pet dawn laite chuan security lamin an din hliah a ngai hial a, player tan inkhelah 100% rilru pek a harsa ang.

Barcelona captain hlui Messi-a'n Ligue 1 lama a goal hmasa ber tur a nghah a la ngai a, a team hian fal takin hma hruai thei mah se an beisei ber goal a la ken tel loh avangin PSG fans lam duh ang a la chhawp chhuahsak lo.