Spurs vul lai a chuai

August thla khan Tottenham Hotspur hian Premier League match thum an khel a, an chak fai vek - an manager Nuno Espirito Santo chu manager of the month atan thlan a ni a, a hnu lamah erawh North London hi an zuih hle.

Pathianni zan inkhelah West Ham United chuan an striker ṭha Michail Antonio-a goal khat hmangin Spurs hi 1-0 in an hneh a, manager David Moyes-a naute hi Europa League chauh ni loin EPL-ah pawh an kang sang tawh hle a ni.

Nuno-a'n Europa Conference League lamah Harry Kane leh Son Heung-min ta a hahchawlhtir a, an che sual a nih kha. Tun ṭumah chuan an ṭhat dan takin a rem nghal a, London Stadium-ah goal khat pawh an sual chhuak thei ta chuang lo.

Hammers manager Moyes chuan, "Club hian vanglai a tawng chho mek niah ka ngai. Tun hun thleng tur hian hun rei tawh tak aṭang khan a lungphum phum a lo ni tawh a, a langsar laiah kan ṭang ta hlauh," tiin a sawi a, a naute a fak hle.

Moyes hian 2004-05 season khan Everton chu league match hmasa pakua aṭangin point 17 a hmuh pui a, manager a nih hun chhunga season a ṭan fuh ber ṭum a ni - tun ṭumah hian a record hmasa hi a nihrual leh mek.

Spurs manager Nuno chuan, "West Ham kha box chhungah an inveng thiam hle, ka naute khel ṭhain nawr viau ṭhim mah se kan vanduai ṭum a ni. Chak lo mah ila lawmna tur tam tak ka hmu, a fuh lo lai kan siamṭha ang," tiin a sawi.

Inkhel dangah Leicester City chuan Brentford 2-1 in an hneh. Foxes tan James Maddison chu kumin February thla hnua a goal hmasa ber a khung a, a khung hma hian Youri Tielemans-a'n goal hmahruai a khung tawh bawk.

Brendan Rodgers-a naute hian an league match hnuhnung zawkah Manchester United 4-2 in an hneh a, Europa League-ah result ṭha an neih hnuah tunah an chak leh ta - Nilaini zan hian League Cup last 16-ah Brighton an mikhual ang.