Hamilton hmaah Verstappen a thleng

Max Verstappen chuan huaisen takin Formula 1 nomawi lak ngei a tum. Red Bull driver hian Pathianni zan khan United States Grand Prix-ah hnehna a chang a, championship lama a elpui Lewis Hamilton chu point 12-in a tlansan ta.

Circuit of the Americas-ah entu mi 140,000 zet an pungkhawm, kum khatah F1 vawi khat chauh an thlen a vangin mipui an pungkhawm chiam hi a mak hran lo - Dutch tlangval hian tun hma lama a la chak ngai lohna hmunah hnehna a chang.

Mercedes driver Hamilton-a'n a hma a awm Max hi na takin a nawr reng, remchang hmu zeuh pawh ni se a tlan pel ang. Mahse, tawnhriat nei tlem zawk Verstappen a buai duh bik lo, a tawp thlengin a inveng tluan thei.

Kum 24 mi Verstappen chuan, "A tir lamah kha chuan ka talbuai deuh, tyre kan thlang fuh tawk loin a lang. Mahse min pui turin team ṭha tak ka nei a, anni khan ka mamawh leh pawimawh chu rang takin min tihsak mai zel," tiin thawhhona ṭha a pawimawh thu a sawi.

Season kal laiah Max-a hian vawi riat hnehna a chang tawh a, record nei ṭha ber a ni. Champion lai leh pahnihna ni bawk Hamilton-a'n vawi nga hnehna a chang ve tawh bawk, intlansiak hmabak panga an la neih hi a hmuhnawm chhunzawm ang.