League Cup - Last 16 Champion lai Man City an inlan dawn
Pep Guardiola-a'n Manchester City a enkawl hnuah hlawhtlinna hrang hrang a chang tawh - nomawi chawi theih tawh phawt chu chawi vek an duh. Spanish manager hian League Cup pawh a zawnin vawi li a chawi tawh.
Man City hian zanin dar 15:15 hian last 16 khel turin West Ham United an tlawh dawn. Pep-a'n a player naupang leh khel khat deuh ṭhenkhat tan hun a siam tur thu a sawi lawk a, awlsam taka tlang theih erawh a ni dawn lo.
Man City bakah hian Liverpool, Tottenham Hotspur leh Leicester City te an inlan vek dawn. Fixtures en mai chuan Reds hmachhawn tur an nem ber a, club dang erawhin an senior player ṭha an chhawr a ngaih a rinawm.
Rinkai City
Manchester City squad chhahzia inhrilh nawn kan ngai lo, bench-a ṭhu leh Premier League lama khel phak lote pawh lut se team ṭha tak daih an la ni tho. Round hmasa lamah Wycombe Wanderers an sawp ṭum pawhin kum 20 hnuai lam player paruk ngawt a chhawr.
Guardiola chuan, "Player naupang ṭhenkhat an khel ang, mahse Wycombe nen kan inkhelh ṭum anga tam chu an khel lo ang, kha tih lai kha chuan senior player inhliam an tam. Tunah chuan hliam an tlem tawh a, ṭhenkhat erawhin hmun an la chang ang.
"England-ah chuan League Cup hi a pawimawh tih ka hria, last 16 thlenga kan la dam thei hi a lawmawm hle. Match khelh tur a tam a, tun ṭuma kan hmachhawn tur hi West Ham an nih avangin a awlsam dawn lo, chutihrualin chak ngei tumin kan bei dawn," tiin a sawi.
Hammers an ṭha
Mahni phak tawka season bul ṭan fuh ber thlang dawn ila West Ham hi en kan an harsa khawp ang. David Moyes-a naute hian Europa League an khelh tawhah hnehna an chang vek a, league lamah pawh palina an ni mek - Man City nen an inthlauhna hi point thum chauh a ni.
Hammers hian League Cup round hmasa lamah khan Manchester United an hneh, zanin an inkhelhna tur hi London Stadium a nih bawk avangin Man City hi hlau leh khur chungin an lo mikhual dawn lo, chak tumin an bei ngam ang.
Moyes-a'n Man United lakah khan a player ṭha ṭhenkhat a hahchawlhtir, zaninah erawh thapui an thawh a rinawm. Tottenham laka chakna goal awmchhun khungtu Michail Antonio a inlan a nih chuan City tlarhnung tan ngaihthah a thiang dawn lo.
Hahchawlh hun
Premier League club ṭhenkhat tan League Cup lama an hmachhawn tur a awlsam lo a, inkhel vek theih a ni dawn lo. Liverpool erawh zanina an hmachhawn tur Preston North End hi Championship club an ni a, hmabak a awlsam deuh dawn niin a lang.
Jurgen Klopp-a naute hian an match hmasa zawkah Norwich City 3-0 in an sawp a, an player ṭha tumah an inlan lo tia sawi theih a ni. Mohamed Salah, Sadio Mane, Virgil van Dijk, Alisson leh Roberto Firmino te phei chu squad-ah pawh an awm lo.
Last 16 ni tawh mah se Klopp-a'n a player ṭhate hahchawlhna hun a la pek a rinawm. Manchester United sawp hlim hian Premier League bakah Champions League an ngai pawimawh a, inelna hmachhawn tur an la ngah avangin an tan zanin chu indahṭhatna hun a ni ang.
Harh ngai Spurs
Nuno Espirito Santo-a'n Europa Conference League-ah Harry Kane leh Son Heung-min a dah ṭha a, an chak lo. League-ah a hmatawng pahnih hi chhawr mah se West Ham lakah goal an khung thei lo a, an tlawm zui leh ta tho - zaninah eng ang takin nge a naute a rem dawn hriat a châkawm tawh hle.
Tottenham hian Burnley an lenchilh dawn a, tun kar tawpah Manchester United an mikhual zui leh dawn. League Cup-ah hian neih ṭhat zawng zawng chhawr a fuh dawn lo, chutihrualin nomawi pakhat tal chawi châka tuihal Spurs hi an tla a nih chuan a nghawng a na dawn.
Burnley hian tlarhnunga an rinrawl Ben Mee chu hripui vangin an chhawr theih a la rinawm lo, training zawm tawh mah se hun a la mamawh. Mee awm lo mah se Charlie Taylor leh Matej Vydra te an la nei a, Spurs hmatawng dan chah a tum ang.