Barcelona tan insiamremna hun a inhawng

El Clasico-a chak lo hlim Barcelona chuan zanin dar 10:30-ah league match an khel dawn a, khualmualah Rayo Vallecano an lenchilh dawn.

Catalan club hian kartawp inkhelah 2-1 in Real Madrid an ngam lo a, La Liga table-ah pakuana dinhmun an luah mek - sum dinhmun ṭha lo karah an beisei ang result an nei thei lo.

Real coach Carlo Ancelotti-a'n inkhelh zawhah Barca boss Ronald Koeman a ṭawng thlamuan a, "Hna harsa tak ni mah se tlawm suh aw," a ti a, Koeman hian hlim hmelin a lo chhawn.

King Carlo chet danin fak a hlawh a, mahse, hmelma kumhlun coach-in ṭawng thlamuan a ngaih tawh chuan Koeman-a Barca hi an hniam hle tawh tihna a ni - zaninah insiamṭha thei tak ang maw?

Aguero a dam ta
Barca-in tun hma anga goal khung pup pup an harsat a, mahse, defender pawimawh Gerard Pique chu tlarhmaah a tal tam phah ṭhin hle - goal an chhuah hnem phah leh bawk si!

Mahse, El Clasico-a an chak zo lo chungin Catalan club hian lawmna tur an nei a, Sergio Aguero chuan Barca a pan hnua a goal hmasa ber a khung. Barca chet ṭhat nan chuan Argentine striker hian goal a khung chhunzawm zel a ṭul ang.

Chutihrual chuan Koeman-a'n Aguero hi bul a ṭantir ngam tawh ang em, tih chu zawhna awm a ni bawk a, Barca-a zawm tirh aṭanga inhliam striker hi kum 33 mi a nih ve tawh avangin dim thiam a ngai.

Mahse, Barca forward Ansu Fati-a'n hliam tenau a nei a, bul ṭantir a ngam awm lo a nih chuan Aguero lo hi chu Catalan club tan duhthlan tur dang an vang hle - Manchester City striker hlui tan Barca khaichhuah a hun e!

De Jong a inhliam
Aguero-a'n ngai a awh chhoh avanga an hlimnain a tawnsan dawn lai takin Catalan club tan chanchin lawmawm lo a awm a, Frenkie de Jong a inhliam.

Kum 24 mi midfielder hi El Clasico-ah a inhliam a, Barcelona chuan an midfielder hian malpuiah hliam a neih thu an sawi. Dutch midfielder tel lohna Barca midfield hi an ngaihtuahawm mai thei.

De Jong bakah rawlthar duhawm Pedri a inhliam bawk a, chuti a nih chuan midfield-ah kum 17 mi Gavi, Sergio Busquets leh Sergi Roberto an inkawp mai a rinawm hle.

Barca tana thu lawmawm erawh Ousmane Dembele-a'n training a zawm leh tawh a, Koeman-a'n a duh chuan a chhawr thei ang - bul a ṭan erawh a rinawm lo.

Barca tan fiahna
Catalan club-in tun season-ah match hautak tia chhal theih aṭangin Bayern Munich, Benfica, Atletico Madrid leh Real Madrid te chu inelna hrang hrangah an hmachhawn tawh a, heng match liah hian goal khat chiah an khung!

Thla hmasa lawka a dinhmun him loh thu an sawi hnua cham chhunzawm Koeman tan a hmabak match nga hi fiahna a ni dawn - hei hi a patlang lo a nih chuan sum nei lo chung pawhin Barca-in ban dan an ngaihtuah a ngai tawh ang.

Barca hian Rayo Vallecano an hmachhawn zawhah Alaves, Dynamo Kiev (Champions League), Celta Vigo leh Espanyol a hmachhawn zui dawn a, he inkhelte hi league leh Champions League-a an kal zel dan tur thui taka hril theitu a ni dawn.

Koeman-a tan Barca fan-te beiseina tinung turin zanin aṭanga chak ṭan a ngai a, zaninah pawh an chak zo lo a nih chuan a dinhmun ṭha lo sa a derthawn belhchhah ang.