2021-ah T20
Indian Premier League vawi 14-nain lung min la len a, thil dang ngaihtuah tura thawk pawh kan lak ṭan hma ngawtin, ICC T20 World Cup lamah mit kan len leh nghal a ngai ta si. T20 tih takah, keini ang mi mawl tana lu hiata mak tih tham kan hmu nghal nawk nawk mai a nih hi.
World Cup hawn ni inkhelah T20 khel thiam West Indies-in England lakah 55 runs chiah an han tlin thei te, rambuai mek Afghanistan lamin 130 runs ngawta Scotland an han ching chau maite chu thilmak a tling. Mahse, T20 a ni tlat.
Afraid-di
Pathianni a ni a, infiamna khawvel tan Super Sunday a ni. Football leh thildang chu dah ṭha ila, T20 World Cup-ah ram inhal India leh Pakistan te Dubai International Stadium-a an intum hun a ni tlat.
Pakistan lam ṭhumvawrah chakin vawm hmasak an thlang. Mi tam zawk ngaihah chuan India chu chak tura rinkai an ni. A chhan chu khawvel ram hrang hranga player ṭha ho ( Pakistan tel loin) fuankhawmna IPL an khel zo chiah a, ICC World Cup ṭum sarih leh T20 World Cup ṭum nga anlo intawn tawhah Men in Blue hian hnehna an chang vek bawk.
Mahse, infiamna khawvel hi record hlui leh history a khelh a ni miau lo a, vawm hmasak thlang Pakistan ball vawm thiam palian Shaeen Afridi a chuan over hmasa berah India innghahna lungpui nghet Rohit Sharma leh KL Rahul a te chu an kawr hak lai pawh suk ngai miah lo turin, dressing room lamah a tir let nghal der mai a, heta ṭang hi chuan India team tan catch up game a ni tluan ta zak a ni.
Bul ṭan that hi chanve zo mai ni loin a pumpui zawhpuina a nih chang a awm chawk. India captain Virat Kohli leh player dangten theihtawp chhuahin 155 runs chu tlin mah se India bowler hahipa kan lo chhuan ṭhin te khel fuh loh ni 'off day' lo inher chhuak ve nen, kawng chhova Road Roller nam kal tum ang lek a ni zo ta a ni.
A mak a na
'Pakistan Kohli' an tih mai, Babar Azam leh a thianpa Mohammad Rizwan te hun a thleng a, India bowler-te ball vawm chu an duhna lai laiah an hlap kual a ni ta ber mai awm e. High Sikul leh Primary Sikul zirlai intum te pawh a ang zo ta. Record te hi chu lehpelh tura siam a ni nameuh mai, ICC World Cup-a Pakistan laka an record ṭha zet mai an thaichhiat danah erawh India mipui tan mittui far lohna chi a ni ta lo.
Aw infiamna khawvel hi a va lo rawng thei ngai tak em. Wicket 10-a han in sawisak em em mai chu. Old Trafford lama lo inkhel ve mek mahni kelmuala si nga faia an hmelhma kumhlun Liverpool laka tlawm Manchester United fans leh India mipui tan khaw hawi ngaihna a awm lo a ni ber awm e. Chutihrual chuan Liverpool khua leh Lahore te chu vanram tlafual a ni ringawt lawi si.
A nghawng!
Tha leh zung, sum leh pai sengtu infiamna khawvela a pawimawh ber te chu fans te an ni. Inkhelh tawp lamah dai a tla bawk nen, bowler tana hna harsa tawh chu dai tla hian tih a harsat belh hle. India ram vawi tam ti hmingṭha tawhtu Mohammed Shami chu Muslim a lo ni kher bawk nen India fans khaw eng hmu thiam tawh lo chuan Pakistan lama hawng turten an deuhsawh ta hial.
India team leh support staff-te in leh lo awmna - Delhi, Mumbai, Bangalore etc te chu a rang a rangin police leh security ṭha hmanga ven a ngai hial. Sawrkar laipui chuan, a ram mi leh sa te lakah cricket hmanga a pasalṭhate venhim chu a tih a ngai ta a, inkhel result nghawng hi a nep lo hle.
Cricket hi zawng Hamara Desh-ah chuan sakhuana leh hnam tluk zeta kan buaipui a ni miau si a nih hi.
BCCI lahin, Thawhṭanni zan lamah kum thar lama Indian Premier League awm leh tura team thar pahnih cheng vaibelchhe sing khat sang thum (Rs 13000 crore) dawna a lo lilam/ hralh thlengin dem a hlawh chho. India team aiin, sum hmuhna ringawt IPL an buaipuiah an ngai. BCCI-in dem leh chhuahchal an hlawhna chhan bulpui ber erawh India-in a hmelma Pakistan a hneh loh vang a ni.
I kal zel ang
Virat Kohli leh a hote chak loh hunah tak an chak loah ngai ta ila. Stage sang zawk leh tawlhthluk thian tawh loh laia chak loh khut ai chuan, tun Pathianni kal taa an mualpho kha a fuh thei zawk. Virat Kohli leh a hote tan anmahnia insiamṭhat ngai laite an infelna hun ṭha a ni thei ang.
Khawvela hriatrengna ( memory) nei tawi ber chu, Sports Fans, Critic, Media te hi an ni an tih fo ang khan, a damdawi ṭha ber chu: a lehpeka, chakna lamtluang zawha hnehna hlado chham veleh vat a ni mai.
Awww! Infiamna khawvelah hian Hero leh Zero, Hosanna leh Khengbet Rawh tia daidangtu bang hi a lo va pan teh lul em!
A changtupa hnar a thi tlat! Thisuk neia thamral mai tur nge a nih? Bollywood finish kan hmu dawn? I lo thlir zel ang!