Australian Open an inhawng zau hret

Tennis season khata Grand Slam hmasa ber Australian Open chuan inkaihhruaina an siam danglam hret. Australia sorkar hian an ram pawn mi Covid-19 hri danna la lote chu visa a pek loh tur thu a sawi a, mahse tunah chuan kawng dang an dap.

Australia hi hripui leng dona kawnga kal fawr berte zinga mi an ni a, an ram chhung mi pawh an thunun nasa hle. Ram dang mi pawh an zuah chuang lo, khawng takin hma an la hmiah hmiah zel.

Amaherawhchu, tennis player tam takin invenna an la lo, an zingah world number 1 leh champion lai ni bawk Novak Djokovic pawh a tel - Serbian star hian a nomawi humhim turin a inlan thei dawn em, tih a chian loh thu a lo sawi tawh.

Kar hmasa mai khan Australian Open khelhna state Victoria thuneitu Daniel Andrews chuan vaccine la lo tan zin luh a harsat tur thu a sawi a, sawisel a hlawh bakah a huap zo lo hleah an ngai, ngaihtuahna dang an hman a ngaih phah ta a ni.

Tuna an thuthar berah chuan vaccine la lo pawhin Australian Open an khel thei dawn. Mahse, tun hma lama an peih loh leh sawisel nasat ṭhin ni 14 chhung inkhung hran a ngai dawn a, hetih chhung hian a khat tawkin hri lakah an fihlim em, tih endik reng a ni ang.

Invenna la kim tawh tan erawh inkhunghran hi a ngai ve dawn lo a, khung hran pawh an ni lo ang - ram chhung hmun dangah pawh anmahni duhna hmunah an tei chhuak thei dawn; vaccine la lo nen chuan an inzalen hleih dawn hle.

Tournament buat-saihtu Tennis Australia chuan thuchhuah an la nei lo thung, season hmasa khan hripui leng vang hian a khelh hun an sawi tlai tawh a, kuminah erawh qualifying aṭangin a hun pangngaia khelh theih an beisei thu an lo sawi tawh.