Match hmasaah Murray a chak

Vienna Open khelh laiah Andy Murray a inlan a, world number 1 hlui hian a match hmasa berah Hubert Hurkacz a hneh - season kal laiah world ranking sang zual 10 zinga mi a hnehna hmasa ber a ni.

Grand Slam vawi thum champion tawh Murray hian darkar hnih leh minute 40 chhungin 6-4, 7-6, 6-3 in hnehna a chang a, set thum hautak taka hnehna chan theih hi Britain tlangval tan chanchin ṭha a ni tel nghal.

Kum 34 mi Murray chuan, "Ka che vel chu a zia sawt viauin ka hria, inkhel hautak leh inhnehtawk taka chak hi chu engtik lai pawhin a nuam, a bik takin hliam vanga chawlh reng hnua hetianga hnehna chan leh chu a nuam danglam bik.

"Tunah chuan hmalam ka thlir leh tawh a, harsatna leh buaina hrang hrang lo thleng ṭhin mah se beidawng loin ka bei zel ang," tiin a sawi a, a khel bawr hliam vangin buai rei tawh viau mah se chawlh mai a la tum lo.

Murray ang thoa Britain player Emma Raducanu-i pawhin tunkar hian inelna a hmachhawn dawn. US Open champion a nih hnuah Raducanu hian match khat a khel leh tawh a, mahse a chak lo - tun ṭumah hian Transylvania Open a khel ang.

Kum 18 mi Raducanu chuan, "Nuam ti taka tennis khelh ka duh ber, ṭha taka khel chhuak turin zalen leh engthawl taka awm ka duh," tiin a sawi. Raducanu hi seeded pathumna pek a ni a, tournament a khelh ve tawh china seeding a chan san ber ṭum a ni.