Ole a chhuak dawn; dawn leh lo!

Liverpool lakah 5-0 in Manchester United an tlawm a, ni lo, an mualpho tih zawk tur a ni e. Ni e, an hmelma kumhlun Liverpool chu Old Trafford ngeiah goal nga an khungtir a, an chhanglet lo - a sawhkhawk chu na tak a ni.

Ole Gunnar Solskjaer ban thu sawi rik nghal a ni a, khawthlang media lam chuan a thlaktu tur thlengin an inrinsiak leh der tawh - English media titi chu thlasik nilum ai paha nu ho titi ang mai a ni a, rin tur leh rin loh tur hriatthiam a harsa chho ṭan.

Media ṭhenkhatin Antonio Conte a lut hnai ang hialin an tarlang tawh a, mahse, media rintlak ber pawl Sky Sports chuan United thuneituten Ole ban an tum lo tih an tarlang a, he thuziak i chhiar meuh chuan a danglam leh tawh mai thei bawk.

Red Devils hian Tottenham Hotspur, Atalanta leh Manchester City an hmachhawn zui dawn a, Ole ban a nih dawn chuan tun hi ban hun a ni lo em ni? tih chu United fans tam tak tan zawhna a ni ngei ang.

Cham rih la
Reds fan-ten, "Ole, cham rih la," tia zai remin United fans an tih el a, goal nga khungtu team lamin an au el dan hi United ṭan inti tan chuan a na a, rei tak chu an bengah a thangkhawk ang.

Mahse, United fan-te duhdan ni lo, Liverpool fan-te duhdan angin Ole a cham dawn nia sawi a ni tlat a, Sky Sports chuan, "Result duhawm lo tak an nei chungin club thuneitu lam aṭang chuan Ole ban tumna a awm lo niin a lang," an ti!

United thuneitute hian Ole hi vawi tam an lo chhan tawh a, tun thlatir khan a assistant Mike Phelan chu contract thar pek a ni a, coaching staff dang Michael Carrick leh Kieran McKenna te nen inbiakna a kal mek bawk.

Ole hi Sir Alex Ferguson, club executive vice-chairman Ed Woodward leh managing director Richard Arnold te chuan hun pek rih an la duh vek a, mahse, a tawpa thutlukna siam tur erawh club neitu zinga mi, co-chairman Joel Glazer a ni - a thutlukna kan hre hman lo.

Rin hlawh lo
Tun dinhmuna United buaina tur langsar tak chu player zingah Ole ring lo an pung zel nia sawi a awm hi a ni a, an elpui club nia an ngaih coach Pep Guardiola, Jurgen Klopp leh Thomas Tuchel te nen an khaikhin a, an lung a awi thei lo - an inthlau bawk a ni!

Kar hmasa Champions League-a Atalanta laka an comeback khan United fans an lawm viau a, mahse, thil thlen dan hmu thiamtu Paul Scholes chuan, "Zanin an khelh dan anga Liverpool laka an khelh chuan a hlauhawm ngawt ang," tiin a sawi.

United legend Scholes-a hlauh ang ngeiin United an khel a, Norwegian coach Ole-a'n starting line-up ngai a rawn ring a, a tihsualzia inhrilhfiahna awlsam ber chu scoreline en a ni - champion tum pahnih inkhel ni loin champion thei team leh kai thar club inkhel ang lek a ni.

Ole an sawiselna langsar tak chu khelmual sir aṭanga a naute a au tam tawk lo leh thurawn a pe tam tawk lo ṭhin chu a ni - Pep, Klopp leh Tuchel en ila, an ṭhu hle hle hman lo a, United player ṭhenkhat chuan 'hetiang' coach hi an awt ve niin an sawi!

Hello Conte
Ole hi ban ni ta se, a hmun ruak luah tura sawi rin ber chu Antonio Conte a ni. Mahse, Italian coach hi mahni thu duh ve tak a nih avangin enkawl a awlsam lo a, a duh chu pek a ngai bawk!

Mahse, khawvela coach langsarte en ila, mahni thu duh lo tu nge awm? Coach naranin thutlukna an siam ngam lohnaah pawh huaisen taka thutlukna siam ṭhin coach-te zel hi coach ropui an ni - i awih loh chuan kan tarlan tak Pep, Klopp leh Tuchel te thlir mai rawh.

Khawthlang media ṭhenkhat chuan United hian Conte hi an be tawh ang hialin an tarlang a, mahse, he thu buatsaih a nih thleng hi chuan English club hian Italian coach hi an la be lo.

Season hmasa Serie A lama Inter Milan champion puitu coach hian United enkawl hi a hreh lo nia sawi a ni a, Chelsea tan Premier League nomawi a lo chawi tawh avangin English football-ah a mikhual lo.

Ronaldo hi...
Solskjaer-a'n United team zawi muangin a din chho niin a lang hman a, nipui transfer-a Raphael Varane leh Jadon Sancho a lakluh phei chuan fans boruak a sang a, defensive midfielder a lakluh belh rinna a lian hle - an mamawh tak pawh a ni.

Mahse, Ole-a'n an mamawh lam ngaihtuah loin fans huhang a zo lo a, a tel lo pawha an buai lohna tur Cristiano Ronaldo a lalut - Juventus forward lakluh avangin United fans lawm viau mah se an mamawh chhanna a ni lo.

Kum 36 mi forward hi a hlawh hnem a, a inti thu a, a khelh ṭhat loh ṭum pawhin Ole-a'n a thlak ngam lo - Mason Greenwood-a'n ball a pek ṭhat duh loh avangin a lungawi lo nia sawi a ni bawk a, hei pawh hi Ole-a'n a chinfel theih loh avangin team boruak tichhetu a ni.

Red Devils hian tun season league match kua an khelh aṭangin goal 16 an khung a, an lamah goal 15 a lut thung! Tlarhmaah Ronaldo, Marcus Rashford, Edinson Cavani leh Bruno Fernandes te ho awm mah se holding midfield-a Scott McTominay leh Fred rin a la ngaih miau si chuan team a khingbai lo thei lo.

Ta se...
Conte ṭhatna em em chu player langsar leh hlawh hnem a hlau lo hi a ni, an ti ṭhin a, Italian coach hian United a enkawl a nih chuan Ronaldo pawh ni se a beisei a phak lo a nih chuan zahngaihna a lantir lo ang.

Hei vang hi a ni mai thei - kum 2019 khan Conte hi Juve lama kir tur anga sawi a awm a, mahse, Italian coach duh lo zingah Ronaldo a langsar hle!

Player ṭhenkhatin Ole an sawiselna langsar chu Jesse Lingard, Donny van de Beek leh Nemanja Matic te chance a pek duh mang loh laia a duhsak zawngte erawh an khel chhe chung pawha a chhawr zel chu a ni.

Conte hian United enkawl ta se, player zawng zawng hi chance inang vek a pek an beisei bawk - tunah erawh engkim hi 'ta se' tih vek a ni a, he thu buatsaih lai chuan Ole a la bang lo e!