Premier League leh number

Khawvela league ngaihven hlawh ber Premier League en turin ni rei nghah a ngai ta lo - June 17-ah chuan mahni sitting room-ah ngei duhthala zal chungin inkhel hmuhnawm en tur kan nei leh tawh dawn a, English top flight league en châknain min zem ṭan. 

August 9, 2019-a khelh ṭan tun season Premier League hi Covid 19 vangin March 13 khan tihtawp lailawk a ni a, vawi tam inrawnkhawmna nei a, thil thleng thei hrang hrangte thlir hnuah June 17-a khelh ṭan turin thutlukna siam a ni. 

Norwich City striker Teemu Pukki-a'n August 2019-ah a vawi khat nan Premier League a khel a, English top flight league-a khelh hmasak ber thlaah hian Player of the Month atan thlan nghal a ni! Finnish striker hian an match hmasa berah 4-1 in Liverpool ngam lo mah se Norwich goal neihchhun hi a khung a, ni riat hnuah Newcastle United laka 3-1 a an chakna inkhelah hattrick a siam zui. 

Premier League match 29 an khelh tawhah Liverpool-in champion turin match hnih chak bak an mamawh tawh lo a, Everton an hmachhawn hma inkhelah Arsenal-in Manchester City an hneh hlauh phei chuan champion turin match khat chak bak a ngai dawn lo. 

City legend Sergio Aguero chuan January 12 khan Aston Villa lakah goal thum khungin hattrick a siam a, Premier League-a hattrick siam ngun ber record thar siamin vawi 12 hattrick a siam tawh. Alan Shearer-a'n Blackburn Rovers leh Newcastle United tana hattrick vawi 11 a lo siam tawh record chu a rawn khum a ni. 

Tun season Premier League-a chak chiang ber chu Leicester City an ni a, October 26 zan khan Southampton chu khualmualah 9-0 ngawtin an sawp a, Jamie Vardy leh Ayoze Perez chuan hattrick an siam ve ve. He inkhelah hian goal kua ngawt a lut chungin heng zinga goal li chauh hi ṭhiante 'assist' aṭanga khung a ni. Ben Chilwell chuan hattrick siam ve lo mah se assist vawi hnih a neih bakah goal khat a khung. 

Liverpool coach Jurgen Klopp chuan January khan Premier League Manager of the Month chawimawina chu tun season-a a vawi nga nan a dawng a, Premier League season khata Manager of the Month chawimawina dawng ngun ber record a siam. Pep Guardiola chuan 2017/18 khan vawi li dawngin record a lo siam tawh a, Klopp hian a rawn khum ta a ni. 

Manchester City midfielder Kevin De Bruyne thiam bikzia hrilh nawn kan ngai lo a, season dang ang thoin tun season-ah pawh a hmuhnawm hle. 

Belgian midfielder thiam bik hian a ṭhiante khung tur ringawt tun season-ah vawi 16 a siamsak tawh - City forward rual tan chuan, "Ka ṭawngṭai chhanna," tih loh rual a ni lo. 

KDB hnuai chiahah tu nge awma in rin? Midfielder emaw forward ni loin tlarhnung lama Liverpool chhuanvawr Trent Alexander-Arnold a ni! Liverpool right back hian vawi 12 ngawt assist a nei tawh a, Sadio Mane, Mohamed Salah leh Roberto Firmino tan chuan ṭhian ṭha tia vuah tlak a ni. 

Liverpool hian Premier League season kal meka assist ngah zual player 10 zingah player pali ngawt an thawh - Arnold bakah hian Firmino, Mane leh Andrew Robertson chu top 10-ah hian an lang a, an ṭhiante tan vawi sarih ṭheuh assist an nei tawh. 

Premier League-a goal khung hnem ber ni mek chu Jamie Vardy a ni a, Leicester City striker hian goal 19 ngawt a khung tawh - Arsenal striker Pierre-Emerick Aubameyang chu Vardy hnaih bertu a ni a, goal 17 a khung tawh. 

Vardy tan thlamuang taka awm a la hun lo a, Aubameyang-a'n Vardy chauh lo pawh elpui a nei tih a hriat a ṭha. Manchester City chhuanvawr Sergio Aguero chuan goal 16 a khung tawh a, Liverpool forward Mohamed Salah chuan goal 16 bawk a khung tawh a ni. 

Southampton lama intuai thar mek Danny Ings hian goal 15 a khung tawh avangin hmuh kan luih a harsa a, Liverpool forward Sadio Mane leh Manchester United striker Marcus Rashford-te hian goal 14 ve ve an khung tawh tih hriat tel a ṭha. 

Jurgen Klopp-a enkawlna hnuaia Liverpool-in hma an sawn hnuah Manchester United nen an inthlau ta deuh a, mahse hei hian English club ropui pahnih inkara inhalna erawh a beng dai zo chuang lo. 

Tun season Premier League khelh tawh chinah pawh entu an tam ber ṭum chu Manchester derby emaw Merseyside derby emaw ni loin Old Trafford-a Liverpool an lenluhna inkhel a ni. 

October 20 zan khan team pahnih hi an inhmachhawn a, 1-1 in an inhnehtawk - he inkhel hi a hmunah mi 73,737 ngawtin an en a, tun season Premier League match khelh tawh chinah hei aia tam entu an la awm lo. 

Old Trafford-a inkhel 'hot'-ah hian United tan Marcus Rashford chuan minute 36-naah goal a khung a, Red Devils hian tun season-a a vawi khat nan league-ah Liverpool an tlawm dawn emaw an ti hman. 

Mahse, hun tawp nan minute nga chiah a awm tawh tihah Liverpool tan Adam Lallana a rawn inlan a, English midfielder hian si phurh sutna goal a rawn khung - Old Trafford-a United fans an reh ṭhuap a, Liverpool fans an lam thung.

 

Lallana hian tun season-ah goal khat chiah a la khung a, goal dang a khung chhunzawm ta lo a nih pawhin a goal khung chhun erawh hriatreng a ni dawn ta a ni. 

Tun season Premier League-a inkhel entu an tlem ber ṭum erawh December 21 khan a thleng a, Bournemouth chuan an mikhual Burnley chu 0-1 in an ngam lo - mi 10,020 lekin inkhel hi a hmunah an en.

 

March 13-a league chawlh lailawk a nih thleng khan Premier League hi a hmunah mi 13,322,096-in an en tawh a, match tina entu mi 39,312 awm zel ang a ni. 

Manchester City-in match khata khel tlemin point 25 laiin hmahruaitu Liverpool phak lo mah se goal khung lamah erawh a chungnung ber an la ni a, match 28 an khelh aṭangin goal 68 ngawt an khung tawh. 

September 21, 2019 khan City hian Watford chu mikhualin 8-0 ngawtin an lo sawp a, tun season Premier League-ah mahni muala goal khung hnem ber leh chak chiang ber an ni. 

Etihad Stadium-a inkhelah hian Bernardo Silva chuan hattrick a siam a, David Silva, Sergio Aguero, Riyad Mahrez, Nicolas Otamendi leh Kevin de Bruyne-ten goal khat ṭheuh an khung bawk. 

Tun season Premier League-a chak chiang ber chu Leicester City an ni a, khualmualah Southampton chu 9-0 ngawtin an sawp. 

Foxes tan hian Jamie Vardy leh Ayoze Perez chuan hattrick an siam ve ve a, Ben Chilwell, Youri Tielemans leh James Maddison ten goal khat ṭheuh an thawh ve bawk. 

Leicester hian goal 58 khung tawhin tun season Premier League-a goal khung tam lamah City (68 goals) leh Liverpool (66 goals) chiah an tluk lo.