IPL club thar pahnih man a to

Indian Premier League 2022-ah club thar pahnih a awm dawn a, Thawhṭanni zan khan Dubai-ah a lilamna hun hman a ni. RPSG Group leh CVC Capital Partners ten team pakhat ve ve an chang.

RPSG hian Lucknow-a innghat tur team chang tur hian Rs 7,090 crore an seng a, dollar maktaduai 930 (£675.2m) a ni pha daih. CVC Capital hian Ahmedabad-a innghat tur team pakhat dang chang tur hian Rs 5,625 crore an seng ve bawk a, dollar maktaudai 690 (£501m) lawih a ni.

Auction kalphung
Kumin August khan BCCI chuan 2022 season-ah team thar pahnih an awm belh tur thu an sawi a, an innghahna khawpui tur atan Ahmedabad, Cuttack, Dharamshala, Guwahati, Indore leh Lucknow te chu thlan theih turin an chhawp chhuak.

Lilamnaa tel tur hian mimal emaw company emaw mimal/company in tel khawm ang pawhin a tel theih. Chutihrualin kum khat chhunga an sum lakluh chu Rs 3,000 crore aia a tam a ngai, company pathum an intelkhawm a nih chuan company pakhat ṭheuh hian kum tinin Rs 2,500 crore an lakluh a ngai.

Company 22-in tender cheng nuai 10 man chu la chhuak mah se club lei tum tak tak erawh company 10 chauh an awm. Club pakhat hi lei turin Rs 2,000 crore aṭangin chhan ṭan a ngai a, company ṭhenkhat an inhnuk dawk hi a mak hran lo.

Sum an seng huai
BBCI chuan Thawhṭanni zan khan Dubai-ah club pahnih tana sum seng huai company pahnih an puang ta a, RPSG Group leh CVC Capital Partners ten team pakhat ve ve an chang.

BCCI president Sourav Ganguly chuan, "IPL-in India khawpui Lucknow leh Ahmedabad-ah hmun a zauh a dawn. IPL team kan ngaihhlutna te, cricket sum dinhmun ṭhatzia hmuh hi a lawmawm hle. Team thar an awm takah chuan IPL 2022 a nghahhlelhawm sawt a ni," tiin a sawi.

Tun hnaia Saudi Arabia Public Investment Fund-in Premier League club Newcastle United an lei khan pound maktaduai 305 an seng a, IPL club pahniha man tlawm zawk Ahmedabad-a innghat tur club aiin pound maktuduai 200 dawnin a tlawm zawk.

Engtin zel?
IPL-ah hian team pariat Chennai Super Kings, Delhi Capitals, Kolkata Knight Riders, Mumbai Indians, Punjab Kings, Rajasthan Royals, Royal Challengers Bangalore leh Sunrisers Hyderabad te an awm sa a, Ahmedabad leh Lucknow ten an belh dawn.

Team 10 an awm dawn tak avangin season khata match 60 awm ṭhin chu match 74-ah a pung chho dawn a, inkhelh dan kalphung erawh group stage leh playoff a la ni reng ang.