ATP Finals khel tur Berrettini

Matteo Berrettini chuan Thawhṭanni zan khan Vienna Open-ah Alexei Popyrin chu 7-6 (3), 6-3 in a hneh a, last 16 a inhlankai bakah season tawpa a thiam pariat khelh tur ATP Finals khel turin a tling chiang nghal.

Kum 25 mi Berrettini chuan, "Ka lawmna hi thua sawifiah chi a ni lo, nikum kha ka tan chuan khelmual chhung leh a pawnah hun harsa a ni a, kuminah erawh lawmna tam tak ka tawng. Player ṭhate chauhin an khelh theih ATP Finals atan ka tling ve mai hi a mak.

"A bul ka ṭanna kha ka la hre reng, a nihna takah chuan hetiang dinhmun meuh hi chu ka suangtuah phak lo," tiin ATP Finals a dahsan thu a sawi a, a thlen chinah a lungawi takzet tih a chiang hle.

Berrettini hma hian world number 1 Novak Djokovic, US Open champion Daniil Medvedev, Stefanos Tsitsipas, Alexander Zverev leh Andrey Rublev te an tling tawh a, tuna a lan dan chuan Casper Ruud leh Hubert Hurkacz te chu tling leh mai thei tur zinga mi an ni bawk.

ATP Finals hi November 14-21 chhung hian Turin khawpuiah khelh a ni ang.