Ashes squad-ah Stokes a tel

All-rounder Ben Stokes chu 2021-22 Ashes Test series khel turin England squad-ah an telh a, Three Lions hian Australia hmachhawn turin an squad ṭha ber an tir dawn. England hi Joe Root-a captain-na hnuaiah an khel ang a, wicketkeeper Jos Buttler chuan vice captain hna a chelh ang.

England aiawha khel tura thlan player 17 te hi ram aiawha Test match khel tawh vek an ni. England head coach Chris Silverwood chuan, "Kan player thlan theih tura awmten tour-a kal vek an duh hi a lawmawm kan ti hle," tiin a sawi.

Ashes hi December 8 hian Brisbane-ah khelh ṭan a ni dawn a, Test match vawi nga khelh tur niin a hnuhnung ber hi Perth-ah nakkum January 14-18 inkara khelh tura ruahman a ni.

England-in World Cup 2019 an champion theih nana player pawimawh Ben Stokes-a'n a kut zung ṭang a tih nat avangin August thlaa India nen Test match vawi ngana an khelhah a tel thei tawh lo a, Indian Premier League-ah pawh Rajasthan Royals tan a khel thei lo. Ashes-ah erawh a inlan thei dawn a, Stokes chuan, "Ka khel thei dawn tih a hriat hian Root pawh a lawm a, keipawhin Ashes khelh hi ka châk a ni," tiin a sawi.