Brazil-ah Marcelo a kir hnai?

Real Madrid fullback Marcelo-a'n Santiago Bernabeu-ah cham chhunzawm turin contract thar a ziah hmel loh a, Brazil lam media ten an tarlan dan chuan Brazilian fullback hi an ram lamah a kir mai thei.

Kum 33 mi Marcelo hian season tawp thleng Real tana khel turin contract a nei mek a, Spanish club-ah hian captain ni mah se a captain nihna hi a hming ang lek a ni - tun season-ah match hnih bak a la inlan lo.

Real hian kar hmasa khan Champions League-ah Shakhtar Donetsk chu 5-0 in an hneh a, he inkhela bench aṭanga luhtir Marcelo hian Real tan Champions League-a a match 100-na a khel.

Marcelo hi Real president Florentino Pérez chuan Champions League-a match 100-a khelh tlin lawmpui nan hian number 100 chuanna jersey a hlan a, Brazilian left back hian match tam thei ang ber khelh a duh thu a sawi.

Real tan inelna hrang hranga match 530 khel tawh defender chuan, "Real tan Champions League-a match 100 ka khel tling thei hi ka lawm takzet a, hmachhawp dangte tihhlawhtlin zel a, a tam thei ang ber inkhelh zel ka duh a ni," a ti.

Mahse, Marcelo hi a inkhel tam lo miau a, Spanish media te chuan Real hnenah chhuah a duh thu a sawi tawh niin an tarlang. Real-a nomawi chawi theih ang chawi kim tawh defender hian June 2022-a a contract zawh pawh nghak kher loa January-a chhuah a duh!

Real boss Carlo Ancelotti chuan Marcelo a ring tawk lo a, Ferland Mendy-a'n rin a hlawh zawk. Hei vang hian Marcelo-a'n a career ṭanna Fluminense-a kir a duh a, Real president Perez chuan a kawng dal a tum lo nia sawi a ni.

Ancelotti-a'n a squad tichhah tur leh player naupang zawkte fuih phur tura a duh erawh chuan thawnthu a danglam thei thung.

Marcelo hian kum 2006 khan Fluminense aṭangin Real hi a zawm a, inelna hrang hrangah match 530 khelhsakin goal 38 a khung a, assist vawi 101 a nei bawk.

Brazil tan vawi 58 inlana goal ruk khungtu defender hian Real-ah La Liga (5), Copa del Rey (2), Supercopa de España (4), Champions League (4), UEFA Super Cup (3) leh FIFA Club World Cup (4) nomawite a lo chawi tawh a, Madrid khawpuiah a hlawhtling hle.

Mimal anga a hlawhtlinna pawh sawi nep theih a ni lo - FIFA FIFPro World XI-ah vawi ruk a lang a, UEFA Team of the Year (3), Champions League Squad of the Season (4) ah te a lang reng bawk a, Real tana a hnathawh ropui hmuh hmaih theih a ni lo.

Real hian zanin dar 1:00-ah league match an khel dawn a, Osasuna an mikhual ang - tun dinhmunah hmahruaitu Real Sociedad chu match khata khel tlem chungin point khatin an phak lo mek.