Kan harh chhuak tawh - Allegri

Juventus manager Massimiliano Allegri chuan season bul ṭan fuh lo mah se an harh chhuah leh tawh thu a sawi a, tun hnaia an result thlir chuan Allegri thusawi hi a mak hran lo.

Italian manager hian a vawi hnih nan Old Lady a enkawl a, a duh ang vekin thil a thleng bik lo. Mahse, tun hnaiah insiamṭhain Serie A table-ah parukna an ni leh der tawh. Chutih rualin hmahruaitu Napoli an phak lohna chu point 10 lai a la ni.

Allegri chuan, "Inter Milan nen kan inkhelh ṭum khan eng ang tak nge kan nih chu a lang. Team indin chho mek ni mah ila kan nghet tawh viau niah ka ngai, inkhelh harsatna San Siro aṭanga point kan hmu thei khan inrintawkna tam tak min siam.

"Player hliam leh harsatna nei neuh neuh an awm ve reng a, hei hi chu football ken tel a ni tih kan hriat a ngai. Season hi a la rei dawn, thil tam tak hmachhawn tur kan la nei a, tawnhriat kan neih tawhna hmangin ṭha takin kan hlen chhuak thei ang," a ti.

Serie A champion lai Inter Milan nena inhnehtawk hlim Juve hi zanin dar 10:00 hian an inlan leh nghal dawn. Allegri naute hian Allianz Stadium-ah Sassuolo an lo mikhual ang.