League Cup-ah Chelsea an chak hram

Premier League hmahruaitu Chelsea-in League Cup quarterfinal lut turin vanneihna an mamawh tel a, last 16 inkhelah Southampton chu penalty hmangin an hneh hram.

Chelsea khelmualah London club leh an mikhual Saints ten minute 90 chhungin goal khat ve ve bak an khung thei lo a, 1-1 in inkhel a tawp.

League Cup-ah semifinal hma chuan extra time a la awm hrih lo a, hei vang hian penalty hmangin chak zawk zawn nghal a ni a, Chelsea-in 4-3 in hnehna an chang.

Blues tan hian Mason Mount chuan chhuih lut lo mah se Saints lamah Theo Walcott leh Will Smallbone ten an pet goal bik lo a, a tawpah team ṭha zawk Chelsea an chak.

A nem ve ve!
Chelsea-in an league match hnuhnung berah 7-0 ngawtin Norwich City an sawp a, Canaries laka inlan player aṭangin Thomas Tuchel-a'n player pasarih ngawt a thlak danglam.

Southampton-in an ṭhat dan berin Stamford Bridge an pan bik lo - Burnley nena 2-2 a inhnehtawk team aṭangin bul ṭantu player pakua ngawt an siksawi a, coach Ralph Hasenhuttl-a'n huaisen takin thutlukna a siam.

Player thlak danglam nasa rau rauah Chelsea squad a chhah zawk a, Blues tana bul ṭantu player-te hi Premier League champion tumpui ngam khawpin an la ṭha cheu.

Chelsea hian minute 44-naah goal hmahruai pawh an khung a, Hakim Ziyech-a corner pet aṭanga ball kal chu Kai Havertz chuan tun season-a a goal thumna ni turin a tauh lut a, chawlhlawk hman zui a ni.

Inkhel hmuhnawm
Stamford Bridge-ah rin lawk ang ngeia goal khung hmasatu chu Chelsea an ni a, Saints-in an mikhualna ramah inthlahrun erawh an tum bik lo.

Second half ṭan aṭanga minute hnihna lekah Kyle Walker-Peters-a shot chu Bluess keeper Kepa Arrizabalaga chuan a man nghet zo lo a, a per lehlam chu Che Adams chuan hnai set sawt aṭangin si phurh sut nan a hmang.

Team pahnihin goal an khung hnuah an innawr tawn zak zak a, Reece James-a shot Fraser Forster-a'n a dansakte chu uiawm a tling - Saul Niguez pawhin Chelsea tana a goal hmasa ber khungna remchang vawi hnih a nei a, a chhawr thei lo.

A tawpa fak phu ber erawh Kepa a ni. Spanish keeper hian Smallbone, Lyanco leh Mohammed Salisu te chance neih chu ṭha zetin a dansak a, Walcott-a penalty kha khawih thawi hman lo se chu a goal ngei ang.

Chelsea buaina
Blues coach Tuchel chuan Saints an hmachhawn hmain César Azpilicueta, Andreas Christensen leh Ruben Loftus-Cheek te hliam vanga a chân thu a sawi a, mahse, hliam hlauhawm erawh a ni lo.

Tuchel-a'n ruahmanna angin team rem thei lo mah se a team a chakpui a, German coach chuan, "Inkhel hmuhnawm tak a ni a, team pahnihin goal khung tumin kan khel ve ve a ni.

"Shootout lamah kan che ṭha - Kepa-a'n a dan bakah an pet fuh lo bawk. Team thar hlak anga khel kan ni a, chuti chunga quarterfinal kan lut thei hi kan lawm hle," a ti - Blues tan hian Mount-a'n penalty khung lo mah se Marcos Alonso, Callum Hudson-Odoi, Ben Chilwell leh James ten an khung.

Saints boss Hasenhuttl chuan, "Inkhel hautak, Cup match dik tak a ni. Chelsea tan hna kha awlsam taka siam kan tum lo a, kan ti ṭhain ka hria. Kan chak zo lo hi a pawi ka ti a, mahse, ka team-te ka chhuang takzet. An vaiin an hna an thawk ṭha em em vek a ni," a ti - Saints tan Walcott leh Smallbone ten penalty an hlah a, Adam Armstrong, Shane Long leh Oriol Romeu ten pet goal mah se team an chhanhim zo lo.